Şu gün Türkmenistanyň Prezidenti Gurbanguly Berdimuhamedow Lebap welaýatyna iş saparynyň barşynda Garlyk şäherçesinde gurulýan kaliý dökünlerini öndürmäge niýetlenen dag-magdan toplumynda boldy. Gurluşyk meýdançasyny gözden geçirmeginiň barşynda döwlet Baştutany kombinatyň esasy önümçilik uçastoklarynda işleriň barşy bilen tanyşdyryldy.
Kärhananyň düýbi 2009-njy ýylyň iýunynda Türkmenistanyň we Belarus Respublikasynyň Prezidentleriniň gatnaşmagynda tutuldy. “Belgorhimprom” Belarus kärhanasynyň türkmen gurluşykçylary bilen bilelikde gurýan toplumy ýylda 1 million 400 müň tonna dökün öndürmäge niýetlenendir.
