30-njy martda Türkmenistanyň daşary işler ministriniň orunbasary Mähri Bäşimowa bilen Birleşen Milletler Guramasynyň çagalar gaznasynyň (ÝUNISEF) Türkmenistandaky wekili Jalpa Ratnanyň arasynda duşuşyk geçirildi. Bu barada Türkmenistanyň DIM-niň resmi saýtynda habar berildi.

Habarda bellenilişi ýaly, taraplar hyzmatdaşlygyň möhüm ugurlaryny, şol sanda bilim, durmuş goraglylygy we durnukly ösüş ugurlarynda bilelikdäki taslamalaryň durmuşa geçirilişini ara alyp maslahatlaşdylar.

Duşuşykda ÝUNISEF-iň 2026 — 2030-njy ýyllara niýetlenen Türkmenistan üçin ýurt maksatnamasyndan gelip çykýan wezipeleri bilelikde durmuşa geçirmek, mekdebe çenli bilimi ösdürilmek meseleleri, şeýle hem jemgyýetçilik işi ulgamynyň ösdürilmegine degişli meseleler, şol sanda hünärmenleri taýýarlamak, täze iş orunlaryny döretmek we institusional gurallary kämilleşdirmek boýunça meseleler ara alnyp maslahatlaşyldy.

Taraplar 2026 — 2030-njy ýyllar üçin çagalaryň irki ösüşi boýunça Milli strategiýasyny kabul etmegiň möhümdigini nygtadylar.

Inklýuziw bilim infrastrukturasyny ösdürmek boýunça taslamalary durmuşa geçirmek hem-de çagalaryň goraglylygy hem-de çagalar boýunça adyl kazyýet işi baradaky Milli maksatnamany taýýarlamak meseleleri hem ara alnyp maslahatlaşyldy.