Aşgabat şäheriniň häkimi Rahim Gandymow Özbegistanyň ilçisi Rawşanbek Alimow bilen duşuşyk geçirdi diýip, «Dunýo» habarlar agentligi habar berýär.

Taraplar türkmen-özbek gatnaşyklarynyň ähli ugurlar boýunça durnukly ösýändigini, paýtagt şäherleriň arasyndaky hyzmatdaşlygyň hem işjeň berkeýändigini nygtadylar.

Duşuşykda doganlaşan şäherler baradaky ylalaşygyň amala aşyrylmagy, söwda-ykdysady gatnaşyklary giňeltmek, wekiliýetleriň özara saparlaryny artdyrmak, maýa goýum taslamalaryny bilelikde durmuşa geçirmek we medeni-ynsanperwer çäreleriň sanyny artdyrmak meseleleri ara alnyp maslahatlaşyldy.

Aşgabatdaky «Daşkent» we Daşkentdäki «Aşgabat» dynç alyş seýilgählerine aýratyn üns berildi, olar iki halkyň dostlugynyň nyşany hökmünde görkezildi.

Şeýle hem taraplar möhüm döwlet senelerine bagyşlanan medeni çäreleri geçirmek boýunça teklipleri ara alyp maslahatlaşdylar.

Duşuşygyň dowamynda halkara forumlara we çärelere özara gatnaşmagy işjeňleşdirmäge gyzyklanma bildirilýändigi tassyklandy.