Türkmenistanyň Futbol federasiýasy ilkinji gezek iki ýaş topary — 15 ýaşa çenli we 17 ýaşa çenli ýetginjekler toparlarynyň arasynda ýurduň birinjiligini geçirýär. Bu ýaryşlara ýurduň Ýokary ligasynyň klublarynyň ýanynda döredilen toparlar gatnaşýar.

17 ýaşa çenli toparlaryň arasyndaky birinjilik 23-nji martda badalga aldy. Ýaryşa sekiz topar gatnaşýar: «Arkadag», «Ahal», «Altyn Asyr», «Şagadam», «Nebitçi», «Aşgabat», «Köpetdag» we «Merw». Birinji tapgyryň netijeleri boýunça «Ahal» «Şagadamy» 3:0 hasabynda ýeňdi, «Merw» «Köpetdagy» 5:1 hasabynda utup, uly hasap bilen ýeňiş gazandy. «Nebitçi» bilen «Altyn Asyr», şeýle hem «Aşgabat» bilen «Arkadag» klublarynyň arasyndaky duşuşyklar 1:1 hasaby bilen deňme-deň tamamlandy.

15 ýaşa çenli toparlaryň arasyndaky birinjilik 24-nji martda başlanýar. Bu ýaş toparynda hem şol sekiz topar çykyş eder: «Arkadag», «Ahal», «Altyn Asyr», «Şagadam», «Nebitçi», «Aşgabat», «Köpetdag» we «Merw».

Iki ýaryş hem iki aýlaw boýunça geçiriler.