Indoneziýanyň paýtagty Jakartanyň etegindäki Bantaragebang zibilhanasy ýykyldy we ýedi adam pida boldy. Bu barada ýerli halas ediş agentligine salgylanýan «MIR 24» habar berdi.

Ýekşenbede ýagan güýçli çabgalar ýurduň iň iri zibil saklanýan ýerleriniň birindäki zibiliň ýykylmagyna getirdi. Agentligiň wekiliniň aýtmagyna görä, halas edijiler heläk bolanlaryň jesetlerini tapdylar. Pida bolanlar zibil daşaýan ýük ulaglarynyň sürüjileri we zibilhananyň çägindäki dükanjyklaryň eýeleri ekeni. Tebigy betbagtçylykda dereksiz ýiten hasaplanan iki adamyň diridigi habarda bellenýär.

Gözleg-halas ediş işlerine 200 adam gatnaşdy, zibiliň aşagynda galan adamlary tapmak üçin ekskawatorlar we ýylylyk duýujy dronlar peýdalanyldy.

Bantaragebang zibilhanasy 110 gektar meýdany eýeleýär. Her gün ol ýere 6,5-den 7 müň tonna çenli zibil eltilýär.