Türkmenistanyň Belgiýadaky ilçisi Sapar Pälwanow Ýewropa Komissiýasynyň Howa hereketleri boýunça Baş müdirliginiň Baş direktorynyň orunbasary Ýan Duşik bilen duşuşyk geçirdi. Bu barada Türkmenistanyň ilçihanasynyň metbugat gullugy habar berdi.

Gepleşikleriň dowamynda taraplar howa we energetika ulgamyndaky özara hyzmatdaşlygyň mümkinçiliklerini ara alyp maslahatlaşdylar. Türkmen tarapy Ýewropa ugrunyň ýurduň 2026-njy ýyl üçin daşary syýasatynyň esasy ileri tutulýan ugurlarynyň biridigini nygtady.

S.Pälwanow Türkmenistanyň «COP28» maslahatynda yglan edilen Ählumumy metan borçnamasyna goşulandygyny, şeýle hem ýurduň Howa boýunça Pariž ylalaşygyna gatnaşýandygyny ýatlatdy. Onuň aýtmagyna görä, bu ädimler zyňyndylary azaltmak, howanyň üýtgemegine uýgunlaşmak we ekologiýa taýdan döwrebaplaşdyrmak meselelerinde ÝB bilen hyzmatdaşlygy çuňlaşdyrmak üçin esas döredýär.

«ÝB «ýaşyl» Türkmenistan üçin: 2024 — 2028-nji ýyllar üçin syýasy gepleşikler we howa hereketleri» maksatnamasyna aýratyn üns berildi. Ilçi bu maksatnamanyň amaly ähmiýetine we eýýäm gazanylan netijelere, şol sanda zyňyndylaryň monitoring mehanizmleriniň ornaşdyrylmagyna ünsi çekdi.

Sebitleýin gün tertibiniň ileri tutulýan ugurlarynyň hatarynda S.Pälwanow suw serişdelerini dolandyrmagy, howanyň üýtgemegine uýgunlaşmagy, Hazaryň derejesiniň peselmegi bilen bagly meseleleri we ekologiýa tehnologiýalarynyň alyş-çalşygyny agzap geçdi. Şeýle hem ol BMG-niň Merkezi Aziýada howanyň üýtgemegi bilen baglanyşykly tehnologiýalar boýunça sebit merkezini döretmek baradaky başlangyjyny hödürledi.

Ýewropa tarapy Türkmenistanyň gün energetikasy we serhetüsti energetika düzümi ulgamyndaky mümkinçiliklerine ýokary baha berdi. Duşuşygyň netijeleri boýunça taraplar ÝB we Merkezi Aziýanyň strategik hyzmatdaşlygynyň çäklerinde ikitaraplaýyn özara hereketleri işjeňleşdirmäge ygrarlydyklaryny tassykladylar.