Türkmenistanyň daşary işler ministri Raşid Meredow Londonyň fond biržasynyň baş ýerine ýetiriji direktory Juliýa Enn Hoggett we Beýik Britaniýanyň Gaznaçylygynyň ykdysady sekretary Lýusi Rigbi bilen bilelikde duşuşyk geçirdi diýip, Türkmenistanyň daşary syýasat edarasy habar berýär.

Gepleşikleriň dowamynda türkmen tarapy Londonyň dünýäniň öňdebaryjy maliýe merkezleriniň biri hökmündäki ornuny nygtady we britaniýaly hyzmatdaşlar bilen özara ykdysady gatnaşyklary artdyrmaga, şol sanda düzümleýin we energetika taslamalaryny amala aşyrmak üçin uzak möhletleýin maýa goýumlaryny çekmäge gyzyklanma bildirdi.

Taraplar söwda-ykdysady gatnaşyklaryň oňyn öňsüş depginini bellediler. Häzirki wagtda Türkmenistanda gurluşyk, senagat, söwda we hyzmat ulgamlarynda işleýän britan maýasynyň gatnaşmagyndaky 30-a golaý kärhana hasaba alnandyr. Türkmen-britan söwda-senagat geňeşi ikitaraplaýyn hyzmatdaşlygy utgaşdyrmagyň esasy guraly hökmünde görkezildi.

Duşuşygyň netijeleri boýunça türkmen tarapy durnukly maliýeleşdiriş, bank ulgamy, audit, ätiýaçlandyryş we sanly çözgütler babatda özara gatnaşyklary giňeltmäge gyzyklanma bildirdi.