Türkmenistanyň U-18 hokkeý boýunça ýetginjekler ýygyndysy 13-nji fewralda, anna güni 18 ýaşdan uly bolmadyk oýunçylaryň arasynda geçirilýän dünýä çempionatynyň üçünji diwizionynyň «B» toparçasynda öz çykyşyna başlaýar. Ýaryş Bosniýa we Gersegowinanyň paýtagty Saraýewoda geçirilýär.

Bäsleşige alty topar gatnaşýar. Olar iki toparça bölünýär. «A» toparça Islandiýanyň, Günorta Afrika Respublikasynyň hem-de Bosniýa we Gersegowinanyň ýygyndylary girýär. «B» toparçada bolsa Türkmenistanyň, Tailandyň we Lýuksemburgyň toparlary çykyş edýär.

Ýaryşyň düzgünnamasyna laýyklykda, her ýygyndy garşydaş toparçadaky ýygyndylar bilen üç duşuşyk geçirmeli. Toparçalaýyn tapgyryň netijeleri boýunça ýarym finala çykjak ýygyndylar kesgitlener: «A» toparçanyň ýeňijisi «B» toparçanyň ikinji orny eýelän ýygyndy bilen duşuşar, «B» toparçanyň ýeňijisi bolsa «A» toparçanyň ikinji orny eýelän ýygyndysy bilen güýç synanyşar. Ýarym finalyň ýeňijileri ýaryşyň altyn medallary ugrunda göreşerler.

Türkmen hokkeýçileri üçin Günorta Afrika Respublikasynyň hem-de Bosniýa we Gersegowinanyň ýygyndylary öňki ýaryşlardan tanyş garşydaşlardyr. Islandiýanyň ýygyndysy bolsa bu gezek ýeke-täk täze garşydaş bolar.

Türkmenistanyň U-18 ýygyndysynyň baş tälimçisi Azatgeldi Bäşimow, onuň kömekçisi bolsa Maksat Ataýewdir. Tälimçiler düzümi ýygyndynyň ýokary ruhubelentligini we baýrakly orunlar ugrunda göreşmäge taýyndygyny belleýär.

Türkmenistanyň ýygyndysy ilkinji duşuşygyny 13-nji fewralda Günorta Afrika Respublikasynyň ýygyndysynyň garşysyna geçirer (Aşgabat wagty bilen 16:30-da). 14-nji fewralda Islandiýa bilen duşuşar (16:30), 16-njy fewralda bolsa ýaryşyň öý eýeleri — Bosniýa we Gersegowinanyň ýygyndysy bilen oýnar (23:30). Dünýä çempionaty 19-njy fewrala çenli dowam eder.

Türkmenistanyň U-18 ýygyndysynyň düzümine derwezeçiler Oraz Jepbarow we Annamämmet Çärşemow; goragçylar Serdarmyrat Ýollyýew, Nuraly Rejepow, Aýmyrat Amanmedow, Rüstem Ömürow, Kyýas Ustaýew, Ruslan Buriýew, Aleksandr Koçetkow we Yhlas Seýitliýew; şeýle hem hüjümçiler Daýanç Batyrow, Ýaroslaw Dawletçin, Kerimberdi Saparmyradow, Röwşen Arçaýew, Hezretaly Mämmedow, Bagtyýar Bäşimow, Döwlet Adylow hem-de Daniýar Konkujaýew girýär.