Türkmenistanyň bilim ulgamynyň wekillerinden ybarat wekiliýet Kembrij şäherinde hünär derejesini ýokarlandyrmak işlerini dowam etdirýär. Bu barada Türkmenistanyň Bilim ministrliginiň saýtynda habar berilýär.

Türkmen wekiliýetiniň düzümine Magtymguly adyndaky Türkmen döwlet uniwersitetiniň, Halkara ynsanperwer ylymlary we ösüş uniwersitetiniň, Döwletmämmet Azady adyndaky Türkmen milli dünýä dilleri institutynyň hem-de Türkmen döwlet mugallymçylyk institutynyň wekilleri girýär.  

Okuw maksatnamasynyň çäklerinde diňleýjiler PRESETT ulgamynda öňdebaryjylyk we strategik meýilnamalaşdyrmak boýunça häzirki zaman çemeleşmeleri bilen tanyşýarlar; iňlis dilini öwretmegiň usullaryny ulanmak boýunça tejribe alyş-çalşyga gatnaşýarlar; şeýle hem guramaçylyk-dolandyryş tejribelerini öwrenýärler. Mundan başga-da, maksatnama sanly bilim platformalaryny ornaşdyrmak boýunça tejribe alyş-çalşygy, okuw sapaklaryna syn etmek arkaly amaly tejribäni toplamagy hem-de dil okuw maksatnamalarynyň gurluşyny häzirki zaman pedagogik ýörelgelerine laýyk getirmek mümkinçiliklerini ara alyp maslahatlaşmagy öz içine alýar.

Bu okuwlar Merkezi Aziýa ýurtlarynyň ýokary okuw mekdepleriniň ýolbaşçy düzümi üçin guralyp, halkara hyzmatdaşlygyny pugtalandyrmaga, bilim ulgamynyň öňdebaryjy tejribelerini öwrenmäge we olary milli bilim ulgamyna ornaşdyrmaga gönükdirilendir.

Ozal habar berşimiz ýaly, Türkmenistanyň bilim ulgamynyň wekilleri Merkezi Aziýa ýurtlarynyň ýokary okuw mekdepleriniň ýolbaşçylary üçin niýetlenen hünär derejesini ýokarlandyrmak okuwlaryna gatnaşýarlar. Bu okuwlar Kembrijde 25–31-nji ýanwar aralygynda geçirilýär.