Gazagystan Türkmenistandan Eýranyň deňiz portlaryna çykýan ulag ýoluny üstaşyr gatnawlarynyň ösüşinde geljegi uly ugurlaryň biri hökmünde garaýar. Bu barada Gazagystanyň Prezidenti Kasym-Žomart Tokaýewiň Gazagystanyň «Turkistan» gazetinde beren interwýusynda nygtaýar.

«Biziň ýurdumyz Hytaýyň «Bir guşak – Bir ýol» atly uly taslamasynyň, «Demirgazyk – Günorta» geçelgesiniň, şeýle hem Hazarüsti ulag ýolunyň ýa-da «Orta geçelgäniň» ösüşine işjeň gatnaşýar. Biz «Russiýa – Gazagystan – Türkmenistan – Eýran» ýolunyň deňiz portlaryna çykýan gatnawlaryny geljegi uly diýip hasaplaýarys. Hytaýyň «Orta geçelgäniň» işine goşulmagyny hoşallyk bilen garşylaýarys» — diýip, Tokaýew belleýär.

Döwlet Baştutany ulag-logistika pudagyndaky mümkinçilikleriň uludygyny nygtaýar: «Umuman, bu pudakda mümkinçilikler örän giňdir. Bu ýerde mesele diňe infrastruktura bilen çäklenmeýär. Bu möhüm nokatda biziň ykdysadyýetimiziň ähli pudaklary diýen ýaly birleşýändir» — diýip, Gazagystanyň Prezidenti nygtaýar.

Tokaýewiň belleýşi ýaly, Gazagystanyň hökümetiniň öňünde häzirki zaman inženerçilik we hyzmat infrastrukturasyna eýe bolan ulag-logistika merkezlerini gurmak, deňiz portlaryny, howa menzillerini, demir ýol wokzallaryny döwrebaplaşdyrmak we abatlamak, şeýle hem täsirli sanly ekoulgamy döretmek wezipesi goýuldy.