Türkmen halkynyň Milli Lideri Gurbanguly Berdimuhamedowyň eserleri azerbaýjan diasporasynyň arasynda uly gyzyklanma döredýär. Şunuň bilen baglylykda, olary azerbaýjan dilinde has giňden ýaýratmak zerur bolup durýar. Bu barada Azerbaýjan Respublikasynyň Diaspora bilen işlemek boýunça Döwlet komiteti tarapyndan guralan wideokonferensiýada çykyş eden «Türkmen Hazar Ýollary» kompaniýasynyň esaslandyryjysy Gaşim Saftarow belledi.

«Gurbanguly Berdimuhamedowyň kitaplary azerbaýjanlylaryň arasynda örän meşhur. Olarda çuňňur pelsepe bar. Iň esasy zat bolsa — maşgala gymmatlyklary we oguzlaryň taryhy», — diýip, Saftarow «Turkmenportalyň» habarçysy bilen söhbetdeşliginde aýtdy.

Onuň aýtmagyna görä, bu eserler lukmançylyk, diplomatiýa, ykdysadyýet, parahatçylyga we abadançylyga ymtylyş ýaly köp sanly ugurlary öz içine alýar. Wideokonferensiýanyň gatnaşyjylary türkmen halkynyň Milli Lideriniň kitaplarynyň azerbaýjan dilinde neşir edilişiniň geriminiň giňeldilmegini arzuw etdiler. Bu bolsa eserleriň Azerbaýjanda hem-de onuň çäginden daşarda ýaşaýan ilatyň has giň gatlaklary üçin elýeterli bolmagyna şert döreder.

Golaýda Türkmenistanyň Daşary işler ministrliginiň Halkara gatnaşyklary institutynda Gurbanguly Berdimuhamedowyň «Hakyda göwheri» atly kitabynyň azerbaýjan dilindäki neşiriniň tanyşdyrylyş dabarasy geçirildi. Bu neşir däp bolan türkmen-azerbaýjan dostlukly gatnaşyklarynyň hemmetaraplaýyn pugtalandyrylýandygynyň nobatdaky subutnamasy boldy.

Tanyşdyryş dabarasynda bellenilişi ýaly, taryhy maglumatlara esaslanýan bu eser türkmen halkynyň şöhratly ýoluny, onuň dünýä medeniýetine goşan goşandyny we beýik şahsyýetleriň ruhy mirasyny açyp görkezýär. Kitap gadymy oguz edebiýatyny öwrenmekde ygtybarly çeşme hökmünde ylmy ähmiýete eýedir.

«Birlikde bolalyň, jebis bolalyň!» atly wideokonferensiýa 31-nji dekabr — bütin dünýädäki azerbaýjanlaryň raýdaşlyk gününe bagyşlandy. Çärä dünýäniň 86 ýurdundan, takmynan, müň töweregi azerbaýjan gatnaşdy.

Maslahatda Döwlet komitetiniň we azerbaýjan diasporasynyň 2025-nji ýyldaky işi boýunça wideohasabat hödürlendi. Diasporanyň birnäçe agzasy daşary ýurtlarda azerbaýjan dilini we medeniýetini wagyz etmekdäki hyzmatlary üçin Azerbaýjan Respublikasynyň «Diaspora işindäki hyzmatlary üçin» medalyna mynasyp boldy.

Türkmenistanda giňden tanalýan telekeçi Gaşim Saftarow ozal «Meşhur adamlaryň durmuşy» tapgyryndan «Geýdar Aliýew» atly kitaby türkmen diline terjime etmek hem-de Türkmenistanyň çägindäki Azerbaýjan ilçihanasynyň meýdançasynda azerbaýjan halkynyň Milli Lideriniň hatyra bagyny döretmek ýaly jemgyýetçilik taslamalaryny amala aşyrdy.

Çykyşynyň dowamynda Saftarow Türkmenistanda ýaşaýan azerbaýjanlaryň adyndan Azerbaýjan Respublikasynyň Prezidenti Ilham Aliýewe gutlaglaryny ýetirdi hem-de Prezident Serdar Berdimuhamedowyň ýolbaşçylygynda Türkmenistanyň alyp barýan bitaraplyk syýasatyna ýokary baha berdi.