Girmek
Şu gün Aşgabatda geçirilýän halkara forumda Eýran Yslam Respublikasynyň döwlet Baştutany Masud Pezeşkian Türkmenistanyň ählumumy parahatçylygy, howpsuzlygy we ösüşi pugtalandyrmak boýunça başlangyjynyň ähmiýetini nygtady. Şeýle-de türkmen Bitaraplygynyň ýubileý senesinde geçirilýän bu ýokary wekilçilikli forumyň halkara giňişlikde gepleşikleri we özara ynamy ilerletmekde möhüm goşant bolýandygyny öňe sürdi. Türkmenistanyň BMG-niň ýanynda Bitaraplygyň dostlary toparyny döretmekdäki roly aýratyn belläp, munuň ýurduň parahatçylyk söýüji diplomatiýa ygrarlydygynyň aýdyň subutnamasy bolandygyna ünsi çekdi.
Eýranyň Prezidenti öz ýurdunyň parahatçylygy, sebitleýin hyzmatdaşlygy we köptaraply gatnaşyklary pugtalandyrmaga gönükdirilen başlangyçlary yzygiderli goldaýandygyny mälim etdi. Şeýle-de durnukly ösüşiň diňe deňhukukly gepleşikleriň, halkara hukugyna hormat goýmagyň we döwletleriň bilelikdäki tagallalarynyň esasynda mümkindigini nygtady.
Çykyşyny jemläp, ol Türkmenistanyň Hökümetine myhmansöýerlik üçin minnetdarlyk bildirdi we Eýranyň parahatçylygy we durnuklylygy pugtalandyrmaga gönükdirilen teklipleri goldamaga taýýardygyny tassyklady.