Aşgabatdaky «Watan» kinokonsert merkezinde Halkara Bitaraplyk güni mynasybetli Türkmenistanyň Magtymguly adyndaky Ýaşlar guramasynyň Merkezi geňeşi hem-de Türkmenistanyň Bilim ministrligi tarapyndan ýurduň umumybilim berýän orta mekdepleriniň 3 — 5-nji synplarynda okaýan okuwçy oglanlaryň arasynda yglan edilen «Merdana nesil — 2025» atly bäsleşigiň jemleýji tapgyry geçirildi. Oňa bäsleşigiň welaýat, Aşgabat hem-de Arkadag şäher tapgyrlarynda 1-2-nji orunlary eýelän oglanjyklar gatnaşdylar.

«Türkmenistan» gazetinde berilýän habara görä, bäsleşik üç şert boýunça geçirildi. Birinji şertde gatnaşyjylar Watana, türkmen halkyna söýgüsini, ata-babalaryň asylly ýol-ýörelgelerine belent sarpasyny, bagtyýar döwrüň milli özgertmelerine bolan buýsanjyny çeper beýan etdiler.

Çagalar bäsleşigiň ikinji şerti boýunça ýekelikde şorta sözleri aýtdylar. Üçünji şertde bolsa ýurtda gazanylýan uly ösüşleri, dost-doganlygy, bagtyýar çagalygy wasp edýän aýdym-sazly çykyşlary ýerine ýetirdiler.

Bäsleşigiň ahyrynda eminler toparynyň biragyzdan gelen netijesine görä, baş baýraga Birleşen Arap Emirlikleriniň Prezidenti Şeýh Zaýed bin Sultan Al Nahaýýan adyndaky Döwletliler köşgüniň 4-nji synp okuwçysy Babajan Meretdurdyýew mynasyp boldy. Birinji orna Balkan welaýatynyň Türkmenbaşy etrabyndaky 18-nji orta mekdebiň 4-nji synp okuwçysy Yslamberdi Nyýazmämmedow, ikinji orna Mary welaýatynyň Murgap etrabyndaky 12-nji orta mekdebiň 4-nji synp okuwçysy Aly Jumamuhammedow bilen Ahal welaýatynyň Bäherden etrabyndaky tebigy ugurly dersleri çuňlaşdyryp öwredýän ýöriteleşdirilen 27-nji orta mekdebiň 5-nji synp okuwçysy Umyt Rzagulyýew, degişlilikde üçünji orunlara bolsa Daşoguz welaýatynyň Daşoguz şäherindäki daşary ýurt diline ýöriteleşdirilen 10-njy orta mekdebiň 3-nji synp okuwçysy Salyh Baýramgeldiýew, Arkadag şäherindäki iňlis diline ýöriteleşdirilen 2-nji orta mekdebiň 3-nji synp okuwçysy Jemşit Allaberdiýew hem-de Lebap welaýatynyň Dänew etrabyndaky 11-nji orta mekdebiň 3-nji synp okuwçysy Meýlisjan Töreýew dagy mynasyp boldy.

Eminler topary bäsleşikde üstünlikli çykyş eden beýleki gatnaşyjylary hem «Şahandaz oglanjyk», «Ylhamly oglanjyk», «Edermen oglanjyk», «Ugurtapyjy oglanjyk», «Watançy oglanjyk», «Sazanda oglanjyk», «Owazly oglanjyk» diýen ugurlar boýunça sylaglady. Ýeňijilere Türkmenistanyň Magtymguly adyndaky Ýaşlar guramasynyň Merkezi geňeşiniň we Türkmenistanyň Bilim ministrliginiň Hormat hatlary hem-de ýadygärlik sowgatlary dabaraly ýagdaýda gowşuryldy.