Ozal habar berşimiz ýaly, şu gün Türkmenistanyň Prezidenti Serdar Berdimuhamedowyň gatnaşmagynda «Altyn halka» döwlet kärhanasynyň täze maldarçylyk toplumy ulanmaga berildi, şeýle hem döwlet Baştutany ýurduň suw hojalyk pudagynyň maddy-enjamlaýyn binýadyny pugtalandyrmak boýunça alnyp barylýan işler bilen tanyşdy. 

«Watan» habarlar gepleşiginde habar berlişi ýaly, Türkmenistanyň Prezidenti täze maldarçylyk toplumy bilen tanyşlykdan soňra, Türkmenistanyň Suw hojalygy baradaky döwlet komitetiniň «Altyn asyr» Türkmen köli aragatnaşyk we gözegçilik dolandyryş edarasyna geldi. Bu ýerde döwlet Baştutany Hytaý Halk Respublikasynyň «Shantui» kompaniýasyndan täze satyn alnan tirkeg çekiji, ýangyç daşaýjy awtoulaglaryň hem-de ekskawatorlaryň tehniki aýratynlyklary bilen tanyşdy.

Häzirki wagtda Türkmenistanyň suw hojalygynyň tehniki binýady yzygiderli pugtalandyrylyp, onuň döwrebaplaşdyrylmagyna iri maliýe serişdeleri gönükdirilýär. Şunuň bilen bir hatarda, suw arassalaýjy desgalar, howdanlar gurlup ulanylmaga berilýär. Şeýle hem goşmaça suw gorlaryny döretmek hem-de oba hojalyk ýerlerini suwarmak üçin gidrotehniki desgalar gurulýar.

Dürli kysymly bu tehnikalar pudagyň öňden bar bolan enjamlaýyn binýadyny pugtalandyrýar, ýokary öndürjilikli bu tehnikalar ýurduň ähli künjeklerinde geçirilýän ýer-suw gurluşyk işleriniň depginlerini artdyrmaga, şor suw akabalaryny gije-gündizleýin tertipde arassalamaga, ekerançylyk ýerleriniň melioratiw ýagdaýyny düýpli gowulandyrmaga mümkinçilik berýär.

Döwlet Baştutany hemişelik Bitaraplygyň 30 ýyllygynyň baýram edilýän günlerinde maldarçylyk pudagynyň täze desgasynyň işe girizilmeginiň, şeýle hem suw hojalygy pudagynyň maddy-enjamlaýyn biýadyny has-da pugtalandyrjak täze tehnikalaryň satyn alynmagynyň aýratyn mana eýe bolandygyny belledi.

Wise-premýer we welaýatlaryň häkimleri oba hojalygy pudagyny ösdürmäge döredip berýän şertleri üçin türkmen halkynyň Milli Liderine hem-de döwlet Baştutanyna tüýs ýürekden hoşallyk bildirdiler.