Türkmenistanyň Ministrler Kabinetiniň Başlygynyň orunbasary Hojamyrat Geldimyradow Gazagystanyň Premýer-ministriniň orunbasary, milli ykdysadyýet ministri Serik Žumangarin bilen duşuşyk geçirdi. Bu barada Gazagystanyň Premýer-ministriniň resmi saýtynda habar berildi.

Wise-premýer Serik Žumangarin Türkmenistanyň Gazagystanyň Merkezi Aziýadaky möhüm hyzmatdaşydygyny belledi. Soňky bäş ýylyň dowamynda haryt dolanyşygy dört esse artdy, soňky iki ýylyň dowamynda bolsa özara söwda durnukly 500 million dollardan ýokary boldy. Döwlet Baştutanlary tarapyndan goýlan maksada laýyklykda, haryt dolanyşygynyň 1 milliard dollara ýetmegine garaşylýar.

Gepleşikleriň aýratyn bir bölegi oba hojalyk önümleriniň özara söwdasyna bagyşlandy. 2025-nji ýylyň 9 aýynda senagat, oba hojalyk we gaýtadan işlenen önümleriň hasabyna Gazagystanyň Türkmenistana eksporty 221,7 million dollara ýetdi. 2025-nji ýylda un, ösümlik ýaglary we beýleki gaýtadan işlenen harytlaryň iberilişiniň artmagy netijesinde eksport ösmegini dowam etdi. Gazagystan bugdaý ununy, günbakary ýagyny, bugdaýy, makaron önümlerini, margarini, çaý konsentratlaryny iberýär.

Serik Žumangarin iberilýän önümleriň möçberini artdyrmagy we oba senagaty önümleriniň görnüşini giňeltmegi, şol sanda bugdaý, mekgejöwen, merjimek, noýba, soýa noýbasy, günbakary ýagy, un, şeker we beýleki önüm görnüşlerini goşmagy teklip etdi.

Habarda bellenilişi ýaly, Türkmenistandan import edilýän önümleriň hem möçberi artýar: 2025-nji ýylyň 9 aýynda ol 141,9 million dollara ýetdi. Tebigy gazdan başga-da, miweler we gök önümler Gazagystana iberilýär. 2025-nji ýylda Gazagystana iberilen pomidoryň möçberi 30 müň tonnadan geçdi we Türkmenistandan import edilýän harytlaryň düzüminde ikinji orny eýeledi.

«Biziň bazarymyzda Türkmenistanyň miwe we gök önümleriň bolmagyna gyzyklanýarys. Türkmenistandan gelýän önümleri, ýagny pomidory, miweleri, gök önümleri — biz «ýaşyl geçelge» (green corridor) çäklerinde kabul etmäge taýýar» diýip, S.Žumangarin nygtady.

Ulag-logistika taslamalaryny ösdürmäge aýratyn üns berildi. Hojamyrat Geldimyradow Hyrat bilen serhetde gury portuň gurluşygynyň başlanandygyny habar berdi we Gazagystana bu taslama goşulmagy teklip etdi.

Taraplar şeýle hem Gazagystan — Türkmenistan — Owganystan — Pakistan üstaşyr geçelgesini döretmegiň geljegini, şol sanda Hyrat — Turgundy demir ýolunyň gurluşygy boýunça maslahatlaşdylar.

H.Geldimyradow we S.Žumangarin ulag, söwda hem-de logistika gatnaşyklaryny ösdürmek, işewürlik üçin goşmaça mümkinçilikler döretmek, ýurtlaryň arasyndaky integrasiýany giňeltmek boýunça işleri dowam etdirmäge taýýardyklaryny tassykladylar.