Girmek
Portugaliýanyň milli ýygyndysynyň hüjümçisi Kriştianu Ronaldu 2026-njy ýylyň futbol boýunça dünýä çempionatynyň onuň sport ýolundaky iň soňkysy boljakdygyny mälim etdi. Bu barada 39 ýaşly futbolçy Saud Arabystanynda geçirilen forumda eden çykyşynda aýtdy — diýip, championat.com saýty ýazýar.
«Indiki dünýä çempionaty meniň futbol ýolumdaky iň soňkysy bolarmy? Hawa, bu hakykat, sebäbi şol wagt men 41 ýaşymda bolaryn. Men şu pursatdan lezzet alýaryn diýip öň hem aýdypdym» — diýip, Ronaldu belledi.
2026-njy ýylyň dünýä çempionaty 11-nji iýundan 19-njy iýula çenli ABŞ-da, Meksikada we Kanadada geçiriler. Portugaliýaly hüjümçi üçin bu mundial onuň futbol durmuşynda bäşinji dünýä çempionaty bolar.
Kriştianu Ronaldu Saud Arabystanynyň «An-Nasr» klubunyň hem-de Portugaliýanyň milli ýygyndysynyň kapitanydyr. Ol milli ýygyndynyň düzüminde Ýewropanyň çempiony boldy. Mundan ozal meşhur futbolçy «Mançester Ýunaýted», «Real» we «Ýuwentus» klublarynda çykyş edipdi.