Girmek
S7 Airlines awiakompaniýasy Aşgabat bilen Nowosibirskiýniň arasynda göni uçar gatnawlaryny açmagy meýilleşdirýär. Bu barada kompaniýanyň Merkezi Aziýa ýurtlary boýunça baş wekili Ýewgeniý Çernyşew XVIII Halkara «Türkmentel–2025» sergisiniň hem-de «Halkara ulag-üstaşyr geçelgeleri: özara arabaglanyşyk we ösüş–2025» atly halkara maslahatynyň çäklerinde habar berdi.
«Indiki ýylyň baharyndan Aşgabatdan Nowosibirskä uçar gatnawyny açarys diýip, biz umyt baglaýarys. Häzir bu ugurda işjeň taýýarlyk işleri alnyp barylýar» — diýip, awiakompaniýanyň wekili aýtdy.
Çernyşew S7 Airlines awiakompaniýasynyň türkmen bazarynda takmynan 20 ýyl bäri işläp gelýändigini ýatlatdy. «Biz 2008-nji ýylda Moskwa – Aşgabat uçar gatnawyny açdyk we şondan bäri Türkmenistana uçuşlary yzygiderli amala aşyryp gelýäris» — diýip, ol belledi. Häzirki wagtda kompaniýa bu ugurda hepdede 7 uçar gatnawyny ýerine ýetirýär.
Türkmenistanyň paýtagtynda 12-nji noýabrda XVIII Halkara «Türkmentel–2025» sergisi we ylmy maslahaty, şeýle hem «Halkara ulag-üstaşyr geçelgeleri: özara arabaglanyşyk we ösüş – 2025» (ITTC-2025) atly halkara maslahat we sergi açyldy. Bu halkara forumy 14-nji noýabra çenli dowam eder.