9-njy noýabrda türkmen topragynyň sahawatyny, rysgal-berekedi alamatlandyrýan Hasyl toýy mynasybetli dabaralar geçirildi. Garagum derýasynyň Aşgabat şäheriniň çäginden geçýän böleginiň kenary baýramçylyk dabarasynyň ýaýbaňlandyrylan esasy merkezi boldy.

TDH-nyň habar bermegine görä, dabara Mejlisiň Başlygy, Ministrler Kabinetiniň Başlygynyň orunbasarlary, Halk Maslahatynyň agzalary, ministrlikleriň, pudaklaýyn dolandyryş edaralarynyň ýolbaşçylary, jemgyýetçilik guramalarynyň, ýurdumyzdaky diplomatik wekilhanalaryň wekilleri, öňdebaryjy oba hojalyk işgärleri, hormatly ýaşulular gatnaşdylar.

Baýramçylyga gatnaşyjylara we myhmanlara milli tagamlar, pişmedir süýjülikler hödür edildi. Özboluşly bezelen sahnada estrada aýdymçylarynyň, döredijilik toparlarynyň Watanymyzyň ýeten sepgitlerini wasp edýän çykyşlary ýaýbaňlandyryldy.

Dabaranyň dowamynda oba hojalyk toplumynyň zähmetkeşleriniň adyndan Türkmenistanyň Prezidentine Hasyl toýy mynasybetli 2022-nji ýylda doglan Perman we Gaýmak diýen atlaryň neslinden bolan Sahabatly atly ajaýyp ahalteke bedewi sowgat berildi.

Açyk asmanyň astynda ýurduň oba hojalyk we gaýtadan işleýän senagatynyň üstünliklerine bagyşlanan sergi guraldy.

Ýurdumyzyň pagtaçylarynyň üstünliklerine bagyşlanan sergi bölüminde ak pagta hanalary, çig maly gaýtadan işlemek arkaly alynýan önümleriň görnüşleri bar. Türkmen pagtasynyň diňe bir milli dokma senagaty üçin esasy çig mal bolman, eýsem, daşary ýurtlara eksport edilýän gymmatly önümdigi-de guwandyryjydyr.

Oba hojalygynda hususy pudagyň gazanan üstünliklerini, suw hojalygynda, atçylyk, maldarçylyk, tebigaty goramak, azyk, gaýtadan işleýän we dokma senagaty ugurlarynda ýetilen belent sepgitleri beýan edýän diwarlyklar dabara gatnaşyjylarda uly gyzyklanma döretdi.

Ak öýleriň ýanynda gazanlar atarylyp, türkmen toýuna mahsus milli tagamlar taýýarlanyldy.

Milli göreş, tanap çekmek, ýaglyga towusmak, küşt we şaşka boýunça geçirilen ýaryşlar ussatlary ýüze çykardy.

Hasyl toýy mynasybetli ýurdumyzyň welaýat merkezlerinde-de maslahatlar, öňdebaryjy oba hojalyk işgärlerini sylaglamak dabaralary, baýramçylyk konsertleri, beýleki medeni-köpçülikleýin çäreler geçirildi.