Türkmenistanyň maliýe we ykdysadyýet ministriniň orunbasary B.Ýalakowyň ýolbaşçylygyndaky wekiliýet 22-23-nji oktýabr aralygynda Ženewada Bütindünýä Söwda Guramasynyň (BSG) baş edarasynyň binasynda geçirilen «CAREC sebiti we köptaraplaýyn söwda ulgamy: Merkezi Aziýada we onuň çäklerinden daşarda integrasiýany çuňlaşdyrmak» atly ýokary derejeli foruma gatnaşdy.

Çäre Bütindünýä Söwda Guramasy hem-de (BSG) Aziýa Ösüş Banky (AÖB) tarapyndan bilelikde guraldy diýlip, Türkmenistanyň DIM-iniň saýtynda habar berildi.

B.Ýalakow forumda eden çykyşynda Türkmenistanyň köptaraplaýyn söwda ulgamyna tapgyrlaýyn integrasiýasynyň ähmiýetini belläp, milli kanunçylygyň BSG-niň kadalaryna laýyk getirilmeginiň hem-de sebit hyzmatdaşlygynyň pugtalandyrylmagynyň ýurduň söwda-ykdysady gatnaşyklaryny giňeltmekde ileri tutulýan ugurlardygyny nygtady.

Forumyň çäklerinde türkmen wekiliýetiniň Bütindünýä Söwda Guramasynyň ýolbaşçylary bilen duşuşygy bolup geçdi. Duşuşykda Türkmenistanyň BSG-ä girmegi boýunça alnyp barylýan işler, agza döwletleriň tejribesiniň öwrenilmegi, şeýle hem halkara hyzmatdaşlar tarapyndan tehniki we maslahat goldawynyň mümkinçilikleri ara alnyp maslahatlaşyldy.