Azerbaýjan Respublikasynyň döwlet nebit kompaniýasy SOCAR 2025-nji ýylyň 22–24-nji oktýabrynda Aşgabatda geçiriljek «Türkmenistanyň nebiti we gazy — OGT 2025» atly 30-njy halkara maslahatynyň we sergisiniň Baş hyzmatdaşlarynyň biri hökmünde çykyş eder. SOCAR kompaniýasynyň prezidenti Rowşen Nadžaf forumyň umumy mejlisine gatnaşar, şunda Türkmenistanyň we Azerbaýjanyň energetika ulgamyndaky hyzmatdaşlygynyň strategik ähmiýete eýedigi nygtalar.

Sebitdäki iň iri energetika kompaniýalarynyň biri hökmünde SOCAR uglewodorod serişdelerini gözlemek, çykarmak, daşamak we gaýtadan işlemek ugurlarynda hyzmatdaşlygy işjeň ösdürýär. Şeýle hem kompaniýa gaýtadan dikeldilýän energetika çeşmeleriniň ösüşine aýratyn üns berýär. SOCAR häzirki wagtda 15-den gowrak ýurtda iş alyp barýar we bu arkaly energetika howpsuzlygyny hem-de durnukly ösüşi goldaýar.

Kompaniýanyň 2035-nji ýyla çenli strategiýasynyň çäklerinde sanlylaşdyrma, innowasiýalaryň ornaşdyrylmagy we «ýaşyl energetika» geçişe aýratyn ähmiýet berilýär. Azerbaýjan bilen Türkmenistanyň hökümetleriniň arasynda «Dostluk» ýatagyny bilelikde özleşdirmek boýunça özara düşünişmek hakynda Ähtnamanyň gol çekilmeginden soň, SOCAR OGT–2025 forumyna gatnaşmagyny iki ýurduň energetika gatnaşyklaryny has-da pugtalandyrmaga gönükdirilen ädim hökmünde görýär.

OGT–2025 forumy «Türkmengaz», «Türkmennebit» döwlet konsernleri we «Türkmengeologiýa» döwlet korporasiýasy tarapyndan Türkmen Energetika forumy bilen hyzmatdaşlykda guralýar. Forumda milli we halkara derejedäki öňdebaryjy kompaniýalaryň wekilleri metan zyňyndylaryny azaltmak we durnukly energetiki geljege geçmek boýunça meseleleri ara alyp maslahatlaşarlar.

Has giňişleýin maglumatlar şu resmi web saýtda elýeterlidir: ogt-turkmenistan.com.