Şu gün Duşenbede iş saparynda bolýan hormatly Prezident Serdar Berdimuhamedowyň Täjigistan Respublikasynyň Prezidenti Emomali Rahmon bilen ikitaraplaýyn duşuşygy boldy. Bu barada TDH habar berýär.

Dostlukly ýurduň Prezidenti belent mertebeli türkmen myhmanyny mähirli mübärekläp, çakylygy kabul edip gelendigi üçin hoşallyk bildirdi hem-de döwlet Baştutanymyzyň şu gezekki saparynyň iki ýurduň arasyndaky däp bolan dostlukly gatnaşyklary has-da pugtalandyrjakdygyny nygtady. 

Hormatly Prezident çakylyk hem-de bildirilen myhmansöýerlik üçin minnetdarlygyny beýan edip, türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň mähirli salamyny we iň gowy arzuwlaryny ýetirdi. 

Şeýle hem döwlet Baştutany şu ýylyň awgustynda Awazada geçirilen BMG-niň Deňze çykalgasy bolmadyk ösüp barýan döwletler boýunça üçünji maslahatyna gatnaşandygy hem-de Türkmenistan bilen Täjigistan Respublikasynyň arasyndaky dostlukly gatnaşyklary ösdürmäge şahsy goşandy üçin Prezident Emomali Rahmona minnetdarlyk bildirdi. 

Dostlukly ýurduň Prezidenti Gahryman Arkadaga iň gowy arzuwlaryny beýan edip, ýokary döwlet derejesindäki özara saparlaryň möhüm ähmiýetini nygtady.

Hormatly Prezident dünýä we sebit syýasatynyň esasy meseleleri boýunça Türkmenistanyň we Täjigistanyň köp babatda gabat gelýändigini ýa-da meňzeşdigini belläp, Türkmenistanyň oňyn Bitaraplyk syýasatyny hem-de halkara başlangyçlaryny goldaýandygy üçin täjik tarapyna minnetdarlyk bildirdi. 

Bellenilişi ýaly, halkara guramalaryň, ilkinji nobatda BMG-niň çäklerinde bilelikdäki işiň oňyn tejribesi toplanyldy. Täjigistan BMG-niň Baş Assambleýasynyň Türkmenistan tarapyndan teklip edilen köp sanly Kararnamalarynyň kabul edilmegini gollady we olaryň awtordaşy bolup çykyş etdi. Öz gezeginde, Türkmenistan Täjigistanyň halkara tagallalaryna ýokary baha bermek bilen, onuň dürli halkara düzümlerinde öňe sürýän netijeli başlangyçlaryny goldaýar.

Şeýle hem söhbetdeşler sebit howpsuzlygy we daşky gurşawy goramak ulgamynda Merkezi Aziýa ýurtlarynyň arasyndaky hyzmatdaşlyk barada pikir alyşdylar. Şunuň bilen baglylykda, şu ýylyň maý aýynda Duşanbede geçirilen Buzluklary gorap saklamak boýunça ýokary derejeli halkara maslahatyň ähmiýeti bellenildi. Bu maslahat ekologiýa deňagramlylygyny saklamakda we suw meselelerini çözmekde buzluklaryň eýeleýän möhüm ornuny görkezdi. 

Söwda-ykdysady hyzmatdaşlyk ikitaraplaýyn gatnaşyklaryň ileri tutulýan ugurlarynyň biri bolup durýar. Taraplar iki ýurduň bu ulgamdaky mümkinçiliklerini doly derejede peýdalanmak, özara haryt dolanşygynyň möçberlerini artdyrmak hem-de ykdysady gatnaşyklary diwersifikasiýalaşdyrmak üçin zerur çäreleri durmuşa geçirmegiň maksadalaýyk boljakdygyny bellediler. 

Şunda Söwda-ykdysady we ylmy-tehniki hyzmatdaşlyk boýunça hökümetara türkmen-täjik toparyna möhüm orun degişlidir. Onuň soňky mejlisi 2024-nji ýylyň oktýabr aýynda Aşgabatda geçirildi. Şunuň bilen baglylykda, ýakyn wagtda toparyň nobatdaky mejlisini geçirmek teklip edildi. 

Şeýle hem Türkmenistan we Täjigistan medeniýet ulgamyndaky gatnaşyklary ösdürmäge uly ähmiýet berýärler. Ylym we bilim ulgamyndaky hyzmatdaşlyk hem möhüm ugurlaryň biri bolmagynda galýar. 

Duşuşygyň ahyrynda hormatly Prezident Serdar Berdimuhamedow hem-de Täjigistan Respublikasynyň Prezidenti Emomali Rahmon iki ýurduň hem däp bolan dostlukly gatnaşyklary mundan beýläk-de ösdürmäge we pugtalandyrmaga ygrarlydygyny tassyklap, birek-birege iň gowy arzuwlaryny beýan etdiler.