Nury Halmämmedowyň adyny göterýän IX Moskwa halkara sungat festiwalynyň — «Dutaryň owazy» festiwalynyň guramaçylyk komiteti şu ýyl Türkmenistandan gatnaşmak üçin iberilen arzalaryň sanynyň ep-esli artandygyny belleýär.

«Şu möwsümde Özbegistan, Hytaý, Russiýa ýaly ýurtlardan gatnaşjak bäsdeşleriň arzalary gelip gowuşdy, aýratyn-da Türkmenistandan gatnaşyjylar tarapyndan iberilen arzalaryň sanynyň ep-esli artandygy bellenilýär» - diýlip, festiwalyň metbugat beýanatynda nygtalýar.

Şeýle hem Nury Halmämmedow adyndaky «Dutaryň owazy» IX halkara festiwalynyň guramaçylyk komiteti Beýik Watançylyk urşunda gazanylan Ýeňşiň 80 ýyllygyna hem-de Halkara parahatçylyk we ynanyşmak ýylyna bagyşlanan festiwalyň jemleýji çäreleriniň maksatnamasyny yglan etdi.

27-nji oktýabrda sagat 12:00-dan 15:00-a çenli Russiýanyň Döwlet kitaphanasynyň Aýdym-saz bölüminiň binasynda «Urşuň keşbi sungatyň aýnasynda» atly halkara ylmy-amaly maslahat geçiriler.

29–30-njy oktýabrda sagat 10:00-dan 20:00 çenli Mariýa Ulýanowa köçesi, 29A salgysyndaky 64-nji çagalar sazçylyk mekdebinde dürli hünärler boýunça ýerine ýetirijileriň milli medeni däplere esaslanýan akademik saz boýunça bäsleşigi we «Sözüň älemi» atly labyzly okamak boýunça bäsleşik guralar.

3-nji noýabrda sagat 18:00-da festiwalyň dabaraly gala-konserti we ýeňijileri sylaglamak dabarasy geçiriler. Bu çäre konsert maksatnamasyny, şeýle-de bäsleşigiň ýeňijilerine baýraklary gowşurmagyň resmi dabarasyny hem öz içine alar.

6–14-nji noýabrda Russiýanyň Döwlet kitaphanasynyň Gündogar edebiýaty merkezinde (Mohowaýa köçesi, 6–8) «Parahatçylygyň öwüşginleri» atly çeperçilik sergi ýaýbaňlandyrylar.

Çäreleriň hemmesine giriş tölegsiz.