Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowa Magtymguly adyndaky halkara baýragy berildi. Türkmenistanyň Prezidenti Serdar Berdimuhamedow 10-njy dekabrda degişli Permana gol çekdi. Bu barada "Watan" habarlar gepleşiginde habar berildi.

Permanda bellenilişi ýaly, türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow bu ýokary sylag bilen berkarar türkmen döwletiniň Garaşsyzlygyny, halkara abraýyny pugtalandyrmakda, dünýä döwletleri we halkara guramalar bilen hyzmatdaşlygyny berkitmekde, Türki medeniýetiň halkara guramasy (TÜRKSOÝ) tarapyndan 2024-nji ýylyň «Türki dünýäsiniň beýik şahyry we akyldary Magtymguly Pyragy ýyly» diýlip yglan edilmeginde, Magtymguly Pyragynyň golýazmalar toplumyny ÝUNESKO-nyň «Dünýäniň hakydasy» maksatnamasynyň halkara sanawyna girizmekde, şahyryň doglan gününiň 300 ýyllygyny 2024-2025-nji ýyllarda ÝUNESKO bilen bilelikde bellenilip geçilýän şanly seneleriň sanawyna goşmakda, Magtymguly Pyragynyň döredijilik mirasyny öwrenmekde hem-de ýaýratmakda, wagyz etmekde we onuň ynsanperwer taglymatyny durmuşa ornaşdyrmakda, şahyryň edebi mirasyny kanun esasynda ebedileşdirmekde bitiren hyzmatlary, saldamly goşandy üçin, şeýle hem Türkmenistanyň Halk Maslahatynyň wekillerinden, ýurduň iri jemgyýetçilik birleşiklerinden, zähmetkeşler toparlaryndan we raýatlaryndan gelip gowşan teklipler göz öňünde tutulyp, Magtymguly Pyragynyň doglan gününiň 300 ýyllygy mynasybetli, Magtymguly adyndaky halkara baýraklar baradaky komitetiň karary nazara alnyp sylaglandy.