Girmek
Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Birleşen Milletler Guramasynyň Çölleşmä garşy göreşmek boýunça Konwensiýasyna gatnaşyjy taraplaryň nobatdaky maslahatynyň çäklerinde Saud Arabystany Patyşalygynyň Er-Riýad şäherinde geçirilen «Bir bitewi suw» sammitine gatnaşdy.
«Al-arabiýa» elektron neşiriniň habar berşi ýaly, türkmen halkynyň Milli Lideri 3-nji dekabrda «Bir bitewi suw» sammitiniň açylyş dabarasynda çykyş etdi. Bellenilişi ýaly, Gahryman Arkadag öz çykyşynda iş ýüzünde häzirki zaman suw tygşytlaýjy hem-de «ýaşyl» tehnologiýalaryň, öňdebaryjy ylmy gazanylanlaryň işjeň ornaşdyrylýandygyny, toplumlaýyn tebigaty goraýyş çäreleriniň durmuşa geçirilmeginiň Türkmenistanyň döwlet syýasatynyň ileri tutulýan ugurlarynyň hatarynda kesgitlenendigini belledi. Şunuň bilen baglylykda, Türkmenistanyň sebit döwletleri bilen suw serişdelerini netijeli peýdalanmak bilen bagly alnyp barylýan işlere hem ünsi çekidi. Şeýle-de suw meselesi we ondan netijeli peýdalanmak boýunça Türkmenistanyň ileri tutýan garaýyşlaryny beýan etdi we birnäçe teklipleri öňe sürdi.