Geljek ýylyň birinji çärýeginde Brýusselde türkmen önümleriniň aýratyn sergisini geçirmek mümkinçiliklerine seredildi. Bu barada Türkmenistanyň Brýusseldäki ilçihanasynda ilçi Sapar Pälwanow bilen Medeni syýasaty dolandyryş boýunça Ýewropa torunyň (MSDÝT) baş sekretary Jannalia Kogliandro Beýens we döredijilik gullugynyň esaslandyryjysy Karawan Kultura Ýelena Wan Haritonowanyň arasynda geçirilen ýygnagyň dowamynda aýdyldy diýip, newscentralasia habar berdi.

Bu sergi ýewropaly tomaşaçylara Türkmenistanyň baý medeni mirasy, milli senetleri we sungaty bilen ýakyndan tanyşmaga mümkinçilik döreder.

Şeýle hem duşuşygyň dowamynda medeni hyzmatdaşlygyň we Türkmenistan bilen Ýewropanyň arasyndaky gatnaşyklary pugtalandyrmagyň geljegi ara alnyp maslahatlaşyldy.

Medeni dolandyryş we medeni syýasatlar boýunça öňdebaryjy Ýewropa platformasy bolan MSDÝT medeniýetiň kämilleşmegine, durnukly medeni başlangyçlaryň ösmegine we halkara derejesinde tejribe we bilim alyşmak üçin gepleşik meýdançasynyň döredilmegine işjeň goldaw berýär.

Duşuşykda bitaraplyk ýörelgelerine esaslanýan Türkmenistanyň daşary syýasatynda alyp barýan parahatçylykly başlangyçlarynyň ähmiýeti nygtaldy. Medeni diplomatiýanyň halkara hyzmatdaşlygynda we we özara düşünişmekde tutýan orny barada bellenildi.

2025-nji – Parahatçylyk we ynanyşmak ýylynyň medeni diplomatiýanyň jebisleşdiriji güýji hökmünde dünýä ýüzündäki ähmiýeti uly bolar. Taraplar medeni köprüleriň halklaryň arasyndaky berk baglanyşygy aňladýandygyny, ynamy we dostlugy berkitmäge kömek edýändigini aýtdylar.

Şeýlelikde taraplar Türkmenistan bilen Ýewropanyň arasynda berk medeni köprüni döretmäge we durnukly, dostlukly gatnaşyklaryň kepili bolup hyzmat edýän parahatçylykly medeni syýasaty ösdürmäge gönükdirilen hyzmatdaşlyga taýýardyklaryny mälim etdiler.