Şu gün günüň ikinji ýarymynda Tähranda iş sapary bilen bolýan türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Eýran Yslam Respublikasynyň Beýik ruhy Lideri Aýatolla Seýed Ali Hoseýni Hameneýi bilen duşuşdy. Bu barada TDH habar berdi.

Habarda bellenilişi ýaly, Aýatolla Ali Hameneýi Gahryman Arkadagy mähirli mübärekläp, Türkmenistan bilen Eýranyň arasynda köp asyrdan bäri dowam edýän we häzirki döwürde okgunly ösdürilýän gatnaşyklaryň derejesine ýokary baha berdi. Şol gatnaşyklar bolsa, dost-doganlyk, hoşniýetli goňşuçylyk we özara hormat goýmak ýörelgelerine esaslanýar.

Türkmenistanyň Halk Maslahatynyň Başlygy Gurbanguly Berdimuhamedow mähirli kabul edendigi üçin minnetdarlyk bildirip, häzirki wagtda türkmen-eýran hyzmatdaşlygynyň okgunly ösýändigini nygtady. Bellenilişi ýaly, Tährana amala aşyrylýan şu gezekki iş sapary Türkmenistanyň Eýran Yslam Respublikasy bilen hyzmatdaşlyga uly ähmiýet berýändiginiň aýdyň subutnamasydyr. Eýran Türkmenistanyň esasy strategik hyzmatdaşlarynyň biri bolup durýar.

Duşuşygyň barşynda dürli ugurlarda, şol sanda medeni-ynsanperwer ulgamda ägirt uly kuwwata we giň mümkinçiliklere eýe bolan netijeli gatnaşyklary giňeltmegiň wajypdygy bellenildi.

Ozal türkmen halkynyň Milli Lideri bilen Eýranyň Prezidenti Masud Pezeşkianyň arasynda gepleşikleriň geçirlendigi barada habar beripdik.