Türkmenistanyň daşary işler ministriniň orunbasary A.Gurbanowyň ýolbaşçylygyndaky Türkmenistanyň wekiliýeti 2024-nji ýylyň 30-njy iýunyndan 1-nji iýuly aralygynda Doha şäherinde BMG-niň howandarlygynda geçirilen Owganystan boýunça ýörite wekilleriň üçünji duşuşygyna gatnaşdy.

Duşuşyga Owganystanyň wekiliýeti hem gatnaşdy.

Türkmenistanyň DIM-niň metbugat gullugynyň habar bermegine gör, duşuşyga gatnaşyjylar Owganystandaky häzirki syýasy, ykdysady we ynsanperwer ýagdaý, Owganystandaky hususy pudagyň mümkinçiliklerini giňeltmek we neşe serişdeleriniň bikanun dolanşygyna garşy göreşmek barada pikir alyşdylar.

Türkmenistanyň wekiliýetiniň ýolbaşçysy öz çykyşynda owgan halkyna hemmetaraplaýyn kömek bermek babatynda Türkmenistanyň yzygiderli alyp barýan işleri barada belledi. Şunuň bilen baglylkda, şu ýyl Aşgabat şäherinde geçirilen Owganystanyň harytlarynyň we hyzmatlarynyň sergisiniň, türkmen-owgan işewürler maslahatynyň we Türkmenistanyň telekeçileriniň Hyrat şäherine amala aşyran saparynyň iki ýurduň hususy pudaklarynyň arasyndaky söwda gatnaşyklaryny giňeltmäge ýardam berjekdigi nygtaldy.

Şeýle hem A.Gurbanow Türkmenistanyň halkara borçnamalaryna laýyklykda beýleki döwletler we halkara guramalar bilen ýakyn hyzmatdaşlykda neşe serişdeleriniň bikanun dolanşygyna we häzirki zaman howplaryna garşy göreşmekde işjeň syýasat alyp barýandygyny belledi.