Ýakynda Türkmenistanyň tennis boýunça 14 ýaşa çenli türgenlerden ybarat ýygyndysy Täjigistanyň paýtagty Duşenbe şäheriniň açyk çempionatyna gatnaşyp, kümüş medallaryň üçüsine mynasyp boldular. Halkara ýaryş Merkezi Aziýa döwletleriniň bäşisinden we Belarus Respublikasyndan, Russiýa Federasiýasyndan hem-de Kanadadan ezber tennisçileriň 90-a golaýyny özünde jemledi.

Ýaryşda türkmen ýygyndysynyň gazanan kümüş medallarynyň ikisinde Aşgabadyň 12-nji orta mekdebiniň okuwçysy Emirhan Rustamowyň ady bar. Ol bu medallary ýekelikdäki çykyşy we paýtagtyň 86-njy orta mekdebiniň okuwçysy Süleýman Hudaýberdiýew (tälimçisi Gurbanberdi Gurbanberdiýew) bilen bilelikde alyp baran çykyşy arkaly gazandy.

«Aşgabat» tennis akademiýasynda Türkmenistanyň milli ýygyndysynyň baş tälimçisi Mirali Gasanowdan tälim alýan Emirhan ýekelikdäki çykyşynda finala çenli barýan ýolda täjigistanly Muhammetýusuf Mukimjonzodadan, gazagystanly tennisçiler Sanjar Juassowdan, Alşinhan Muhamekaliden, Bekarys Kuandykdan üstün çykyp, diň birinji orun ugrundaky duşuşykda Amir Askardan (Gazagystan) ýeňildi.

Rustamow ― Hudaýberdiýew jübüti jübütleýin ýaryşlara çärýekfinaldan girişdiler. Olar ýaryşyň bu tapgyrynda türkmenistanly Ylýas Mämmetgulyýew bilen gazagystanly türgen Aldiýar Narimanyň emele getiren jübütindün üstün çykyp, ýarymfinala adyny ýazdyrmagy başardylar. Ýarymfinalda gazagystanly tennisçiler Sanjar Juassow bilen Bekarys Kuandyk hem türkmen türgenlerinden asgyn geldi. Finalda bolsa Emirhan bilen Süleýman ýene-de Amir Askar we onuň jübüti Arken Syzdykow bilen duşuşmaly boldular. Bu duşuşyk hem gazagystanly tennisçileriň üstünligi bilen tamamlandy.

Duşenbe şäheriniň açyk çempionatynda türkmen ýygyndysynyň üçünji kümüş medalyny paýtagtdaky 87-nji orta mekdebiň 5-nji synp okuwçysy Näzli Hudaýgulyýewa gazandy. Mälik Muhammetgulyýewiň şägirdi jübütleýin ýaryşda gazagystanly Kseniýa Semýonowa bilen bilelikde ilki bilen Aýnur Agamyradowa (Türkmenistan) ― Darýa Kožuhowa (Gazagystan) jübütini, soňra-da gazagystanly uýalar Wlada we Ýuna Degtýarlary ýeňdiler. Türkmen-gazak halkara jübüti diňe final duşuşygynda gazagystanly tennisçiler Wlada Kuzmenko bilen Sofiýa Pakdan asgyn geldiler.

Ýeri gelende, türkmenistanly ýaş tennisçileriň kämil mekdebiniň kemala gelýändigini nygtamak gerek. Şunda hormatly Prezidentimiziň tagallasy bilen bassyr iki ýyl bäri merjen paýtagtymyzda 12 ýaşa çenli çagalaryň arasynda geçirilýän halkara ýaryşyň ähmiýeti diýseň uludyr. Ýokarda atlary geçen ýeňijiler şol ýaryşlarda taplanyp, bu gün dünýä döwletlerinde geçirilýän iri sport baýramçylyklarda döwletimiziň şanyna şan goşup bilýän türgenlere öwrüldiler. Geçen ýyl Aşgabatda geçirilen ýaryşda ýurdumyzyň 12 ýaşa çenli ýygyndy toparynyň taryhda ilkinji gezek özbegistanly tennisçilerden üstün çykmagy ýa-da 14 ýaşly Ilima Guseýnowanyň geçen ýyl halkara ýaryşlaryň ençemesinde baýrakly orunlara eýe bolup, öz ýaş derejesinde Aziýanyň iň güýçli tennisçileriniň ilkinji dörtlügine girmegi Türkmenistanda sportuň bu görnüşiniň geljeginiň has parlak boljakdygyny buşlaýar.