Girmek
Türkmenistanyň Prezidenti Serdar Berdimuhamedowyň 2023-nji ýylyň 1-2-nji dekabrynda Dubaý şäherinde Birleşen Milletler Guramasynyň Howanyň üýtgemegi baradaky Çarçuwaly konwensiýasyna (COP28) gatnaşyjylaryň maslahatynyň ýigrimi sekizinji mejlisinde eden çykyşyndaky howanyň üýtgemegi we daşky gurşawyň howpsuzlygy baradaky milli garaýyşlaryň beýany Baş Assambleýanyň 78-nji mejlisiniň resmi resminamasy hökmünde BMG-niň alty resmi dilinde neşir edildi we ýaýradyldy.
Bu barada Türkmenistanyň Daşary işler ministrliginiň metbugat gullugy tarapyndan habar berildi.
Resminamada Türkmenistanyň Global Metan borçnamasyna goşulmagy we Birleşen Milletler Guramasynyň Daşky gurşaw boýunça maksatnamasy (UNEP) bilen bilelikde BMG-niň Merkezi Aziýada Howanyň üýtgemegi tehnologiýalary Sebit merkeziniň Türkmenistanda açylmagy üçin kanuny esas döredilendigi barada habar berilýär.
Beýannama Baş Assambleýanyň 78-nji mejlisiniň gün tertibiniň «Adamzadyň häzirki we geljekki nesilleriniň bähbidine global howany goramak» hem-de «Merkezi Aziýada parahatçylyk, ynam we hyzmatdaşlyk zolagy» bentleri boýunça neşir edildi diýip, çeşme belleýär.