4-5-nji ýanwarda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Birleşen Arap Emirliklerine iş saparyny amala aşyrdy. Saparyň birinji gününde Türkmenistanyň Halk Maslahatynyň Başlygy Abu Dabide boldy, ikinji güni bolsa Dubaýa gitdi.

Saparyň dowamynda gol çekilen resminamalar:

• «Türkmengaz» döwlet konserni bilen Abu-Dabiniň milli nebit kompaniýasynyň (ADNOC) arasynda özara düşünişmek hakynda Ähtnama. Resminamanyň maksady taraplaryň «Galkynyş» gaz käniniň III tapgyryny özleşdirmek üçin strategik hyzmatdaşlary çekmek meýlinden we olaryň tebigy gazy sebitiň ýurtlaryna we beýleki döwletlere ibermek üçin gaz geçiriji infrastrukturany gurmaga degişli energetika taslamalaryny durmuşa geçirmäge gatnaşmak mümkinçiliginden ybaratdyr;
• «Türkmengaz» döwlet konserni bilen Abu-Dabiniň milli nebit kompaniýasynyň (ADNOC) arasynda hyzmatdaşlyk etmek hakynda Ähtnama. Resminamanyň maksady taraplaryň metanyň atmosfera zyňyndylaryny azaltmak ulgamynda özara bähbitli ylmy-tehniki we ykdysady hyzmatdaşlygyň geljekki mümkinçiliklerini öwrenmek meýlinden ybaratdyr;
• Türkmenistanyň Döwlet daşary ykdysady iş bankynyň hem-de «First Abu Dhabi Bank» bankynyň arasynda hyzmatdaşlyk etmek hakynda Ylalaşyk;
• «Türkmennebit» döwlet konserniniň we «Dragon Oil (Türkmenistan) Ltd.» kompaniýasynyň arasynda özara düşünişmek hakynda Ähtnama;
• Türkmenistanyň Ministrler Kabinetiniň ýanyndaky Ulag we kommunikasiýalar agentliginiň «Türkmenhowaýollary» agentliginiň hem-de «Dubai Aviation Corporation» kompaniýasynyň arasynda özara düşünişmek hakynda Ähtnama.

Ýokary derejeli gepleşikler

«Al Şatie» Prezident köşgünde türkmen halkynyň Milli lideri Gurbanguly Berdimuhamedow BAE-niň Prezidenti Şeýh Mohammed bin Zaýed Al Nahaýýan bilen duşuşdy.

Taraplar uzak möhletleýin ikitaraplaýyn hyzmatdaşlygyň netijeli häsiýetini kanagatlanma bilen bellediler we ýakyn hem-de özara bähbitli gatnaşyklary ösdürmek baradaky isleglerini mälim etdiler.

Duşuşykda BAE-niň Türkmenistanyň ygtybarly ykdysady hyzmatdaşydygy aýratyn nygtaldy. Energetika, ulag, senagat we ýokary tehnologiýa ýaly ugurlarda üstünlikli hyzmatdaşlyk bellenildi.

Duşuşygyň dowamynda ylym, medeniýet we sport ýaly ugurlarda hyzmatdaşlygy has-da güýçlendirmek barada ylalaşyk gazanyldy.

Duşuşygyň ahyrynda Halk Maslahatynyň Başlygy Gurbanguly Berdimuhamedow Şeýh Mohammed bin Zaýed Al Nahaýýany özüne amatly wagtda Türkmenistana gelip görmäge çagyrdy.

BAE-niň işewür wekilleri bilen duşuşyklar

Iş saparynyň çäklerinde türkmen halkynyň Milli Lideri Gurbanguly Berdimuhamedow «Dragon Oil» kompaniýasynyň direktorlar geňeşiniň başlygy Saýed Al Taýer bilen duşuşdy.

Taraplar Türkmenistan bilen BAE-niň arasynda, şol sanda halkara guramalaryň çäginde uzak möhletli netijeli hyzmatdaşlygy bellediler, uly energetika taslamalaryny, şol sanda türkmen uglewodorodlaryny eksport etmek üçin gaz geçirijilerini gurmak boýunça bilelikdäki işleri dowam etdirmäge taýýardyklaryny tassykladylar.

«Dragon Oil» kompaniýasynyň Türkmenistanda ýigrimi ýyldan gowrak wagt bäri alyp barýan işleri aýratyn bellendi. Duşuşygyň netijesinde «Türkmennebit» döwlet konserni bilen «Dragon Oil» (Türkmenistan) Ltd.» arasynda özara düşünişmek hakynda Ähtnama gol çekildi.

Ondan soň, Türkmenistanyň Halk Maslahatynyň Başlygy Gurbanguly Berdimuhamedow «Dubai Aviation Corporation» (Flydubai) kompaniýasynyň täjirçilik direktory Hamad Obaýdalla bilen duşuşdy.

Taraplar ulag pudagynda hyzmatdaşlygy giňeltmek isleýändiklerini tassykladylar. 2010-njy ýyldan bäri Türkmenistan bilen BAE-niň arasynda howa aragatnaşygynyň ýola goýlandygy, hususan-da, Aşgabat — Dubaý — Aşgabat ýaly yzygiderli gatnawlaryň amala aşyrylandygy bellenildi.

Uçuşlaryň sanyny köpeltmek we awiasiýa işgärlerini taýýarlamak boýunça hyzmatdaşlyk etmek bilen bir hatarda «Flydubai» bilen mundan beýläkki hyzmatdaşlygyň geljegi ara alnyp maslahatlaşyldy. Duşuşygyň netijesinde «Türkmenhowaýollary» agentliginiň hem-de «Dubai Aviation Corporation» kompaniýasynyň arasynda özara düşünişmek hakynda Ähtnama gol çekildi.

Resmiler bilen duşuşyklar

Abu Dabiniň Halkara howa menzilinde Türkmenistanyň Halk Maslahatynyň Başlygy Gurbanguly Berdimuhamedow BAE-niň energetika ministri Suhail Al Mazrui we beýleki resmi adamlar bilen duşuşdy.

Soňra BAE-niň Prezidentiniň Türkmenistan bilen işler boýunça wekili Mohamed Said Mohamed Al-Ariki bilen duşuşyk geçirildi. Gepleşikleriň dowamynda söwda we ykdysady, bank we maliýe, ýangyç we energetika ugurlary ileri tutulýan ugurlar hökmünde kesgitlenildi.

Hökümet agzalary bilen duşuşyk

BAE-de bolmagynyň çäklerinde Türkmenistanyň Halk Maslahatynyň Başlygy Gurbanguly Berdimuhamedow Ministrler Kabinetiniň Başlygynyň käbir orunbasarlarynyň hem-de beýleki ýolbaşçylaryň gatnaşmagynda iş maslahatyny geçirdi.

Duşuşykda ulag pudagyndaky gatnaşyklary has-da pugtalandyrmak we esasy söwda ýollarynyň çatrygynda ýerleşýän Türkmenistanyň üstaşyr ulag kuwwatyndan netijeli peýdalanmak meseleleri ara alnyp maslahatlaşyldy. Aşgabat bilen Dubaýyň arasynda uçuşlaryň eýýäm ýola goýlandygy we Abu-Dabä uçuşlaryň hem dowam etdiriljekdigi bellenildi.

Mundan başga-da, Türkmenistanyň daşary ýurtlar bilen maýa goýum hyzmatdaşlygynyň barha baý many-mazmuna eýe bolýandygy nygtaldy.