Girmek
Ýokary liganyň geçen möwsüminde jemi 11 futbolçy öz derwezesine pökgi geçirdi. Olaryň dördüsi «Aşgabada» (Garly Garlyýew, Şamämmet Agamammedow, Begmyrat Arbatow we Ýeňiş Berdimyradow), üçüsi «Ahala» (Şöhrat Söýünow, Furkat Tursunow we Möwlamberdi Goşşanow), galanlary «Köpetdaga» (Myrat Amantaganow), «Energetige» (Aşyr Jumadurdyýew), «Merwe» (Ambýar Mahmudow) we «Şagadama» (Ýunus Orazmämmedow) degişlidir.
Möwsümiň ilkinji awtogoly 4-nji tapgyrda «Ahalyň» goragçylary Şöhrat Söýünowyň we Furkat Tursunowyň goşa säwligi bilen hasaba aldyndy. Soňra 7-nji tapgyrda «Aşgabatdan» Garly Garlyýew, 10-njy tapgyrda onuň topardaşy Şamämmet Agamämmedow, 16-njy tapgyrda ýene bir «aşgabatly» Begmyrat Arbatow şeýle ýalňyşlygy goýberdi.
18-nji we 19-njy tapgyrda janköýerler awtogollaryň üçüsine şaýat boldular. Bu tapgyrlaryň ilkinjisinde «Ahaldan» Möwlamberdi Goşşanow garşydaş topara «kömek eden» bolsa, 19-njy tapgyrda şeýle «ýürekdeşlik» «Köpetdagdan» Myrat Amantaganow bilen «Energetikden» Aşyr Jumadurdyýewden geldi.
Yzygiderli awtogollar 24-nji we 25-nji tapgyrlarda-da bellige alyndy. 24-nji tapgyrda «Merwden» Ambýar Mahmudow şeýle ýalňyşlygy goýberen bolsa, 25-nji tapgyrda Ýeňiş Berdimyradow «Aşgabadyň» möwsümdäki dördünji awtogoluna gol çekdi. Möwsümde iň soňky awtogol bolsa 27-nji tapgyrda «Şagadamyň» futbolçysy Ýunus Orazmämmedowdan geldi.