Girmek
Ýagşygeldi Kakaýew adyndaky Halkara nebit we gaz uniwersitetiniň «Gara altyn» topary futzal boýunça Türkmenistanyň Kubogy ugrundaky bäsleşigiň ýeňijisi boldy. Bu barada TFF-niň resmi saýtynda habar berildi.
Döwlet Annaýewiň tälimçiligindäki «Gara altyn» toparynyň final duşuşygyndaky garşydaşy «Köpetdag» topary boldy. Ikitaraplaýyn hüjümlere baý bolan duşuşykda «Gara altyn» topary garşydaşynyň derwezesinden jogapsyz toplaryň üçüsini geçirmegi başardy. Final duşuşygynyň yzysüresi baýrak gowşurylyş dabarasy geçirildi.
Ýeňijilere baýraklary TFF-niň Başlygynyň orunbasarynyň wezipesini wagtlaýynça ýerine ýetirýän Berdimyrat Nurmyradow bilen TFF-niň Futzal bölüminiň başlygy Annanur Gulow gowşurdylar.
Toparlaryň 8-siniň gatnaşmagynda geçirilen Kubok ugrundaky bäsleşikde toparlar ilki toparçalaýyn bäsleşikde güýç synanyşdylar. Her toparçada ilkinji iki orny eýelän toparlar bolsa ýaryşy ýarymfinaldan dowam etdirdiler.
Final duşuşygynyň netijesi:
«Köpetdag» — «Gara altyn» – 0:3
Gollar: Watan Ataýew, Maksatseýit Mürjikow, Maksat Amanow («Gara altyn»).