Türkmenistanda

1. Türkmenistanyň Prezidenti Serdar Berdimuhamedow sanly ulgam arkaly Ministrler Kabinetiniň nobatdaky mejlisini geçirdi. Onda öňde boljak halkara çärelerden başlap, milli ykdysadyýeti döwrebaplaşdyrmagyň meýilnamalaryna çenli döwlet durmuşynyň ileri tutulýan meseleleri ara alnyp maslahatlaşyldy. Saglygy goraýyş, bilim, söwda, senagat we ulag ulgamlary aýartyn üns merkezinde boldy. Täze ýyl baýramynyň ýakynlap gelendigi sebäpli Prezidenti Serdar Berdimuhamedow degişli düzümleriň ýolbaşçylaryna ýurduň bazarlarynda azyk harytlarynyň dürli görnüşleriniň bolelin, elýeterli bahalardan üpjün edilmegini tabşyrdy.

2. Türkmenistan Ýewropa Bileleşigi bilen hyzmatdaşlygy pugtalandyrmak maksady bilen Brýusselde geçiriljek birnäçe çärelere gatnaşar. Hususan-da, Türkmenistanyň wekiliýeti 18-nji dekabrda geçiriljek Adam hukuklary boýunça «Türkmenistan — Ýewropa Bileleşigi» dialogyna gatnaşar. 19-njy dekabrda türkmen wekiliýeti «Türkmenistan — Ýewropa Bileleşigi» bilelikdäki toparyň 22-nji duşuşygyna gatnaşar, onuň dowamynda taraplar ykdysady hyzmatdaşlygy berkiderler. Şeýle hem Türkmenistan 2024-nji ýylyň 29-30-njy ýanwarynda Belgiýanyň paýtagtynda geçiriljek Ulag ulgamynda maýa goýum forumyna gatnaşar.

3. 2024-2025-nji okuw ýylynda Türkmenistan ýaş raýatlaryny Hytaý Halk Respublikasynyň we Wengriýanyň ýokary okuw mekdeplerine bilim almaga ibermegi meýilleşdirýär. Ýaş hünärmenler maglumat tehnologiýalary, saglygy goraýyş we lukmançylyk ylymlary, bilim, pedagogika ylymlary, oba hojalygy we oba hojalyk ylymlary, inženerçilik işi, tehnologiýalar, tehniki ylymlar, matematika we tebigy ylymlar ugurlary boýunça taýýarlanarlar.

4. 2024-nji ýylyň dowamynda Türkmenistanda Änew şäheriniň 2024-nji ýylda «Türki dünýäniň medeni paýtagty» diýlip yglan edilmegi mynasybetli birnäçe halkara çäreler guralar. Şu maksat bilen, geçiriljek dabaralaryň we çäreleriň Meýilnamasy tassyklanyldy hem-de degişli guramaçylyk topary döredildi.

5. 15-nji dekabrda şatlykly we mähriban baýramyň — Täze ýylyň ýetip gelýändigini alamatlandyryp, Türkmenistanyň Baş arçasynyň yşyklary ýakyldy. Asylly däbe görä, «Älem» medeni-dynç alyş merkeziniň öňündäki giň meýdança dabaralaryň geçirilýän merkezine öwrüldi. Bu ýerde iň owadan belent arça oturdylyp, ertekiler şäherjigi emele geldi. Belent başy «2024» ýazgyly sekizburçly ýyldyz bilen bezelen Baş arçanyň beýikligi 44 metre, ini bolsa 16 metre deňdir.

6. Türkmen aýdymçy Bahar Annaýewa ýaş aýdymçylaryň arasynda geçirilýän «Ýylyň parlak ýyldyzy – 2023» bäsleşiginiň Baş baýragyna mynasyp boldy. Bäsleşigiň jemleýji tapgyry asylly däbe görä, Täze ýyl baýramynyň öňüsyrasynda Arkadag şäheriniň söwda toplumynyň «Arzuw» toý mekanynda geçirildi. Çäräniň maksady ýaşlaryň döredijilik başlangyçlaryny höweslendirmekdir. Ýeňijä göçme kubok hem-de gymmat bahaly sowgat gowşuryldy.

Dünýäde

7. Amerikaly aýdymçy Ledi Gaga çagalar üçin kitap çykarar. Onda aýdymçynyň çagalygy, arzuwlary, zähmetsöýerligi we sahnadaky üstünlikleri barada gürrüň berler. Kitap 2-nji ýanwarda satuwa çykar. «Amazon» saýtynda bu neşiri öňünden sargyt etmek mümkindir. Ol eýýäm saýtdaky iň köp satylan çagalar üçin kitaplaryň sanawynda birinji orny eýeledi.

8. 2024-nji ýylyň ýanwar aýynda Türkiye ilkinji kosmonawtyny Halkara kosmos stansiýasyna iberer. Ol Harby howa güýçleriniň uçarmany Alper Gezerawjy bolar. Ol kosmosda 13 sany ylmy synag geçirer.

Sport habarlary

9. Aşgabatda futzal boýunça Türkmenistan kubogy başlanýar. Oýunlar Türkmen döwlet bedenterbiýe we sport institutynyň sport toplumynda geçiriler. Kubok ugrundaky göreş iki toparça bölünen 8 toparyň arasynda bolar. Düzgüne laýyklykda, toparçalaýyn tapgyr bir gezeklik aýlaw ulgamy boýunça geçiriler. Her toparçadan iň gowy iki topar ýarym final oýunlarynda oýnarlar.

10. Hytaý Halk Respublikasynyň Medeniýet ýylynda Türkmenistanda geçiriljek çäreleriň çäklerinde Aşgabatda hytaý söweş sungatyny görkezýän topar çykyş eder. Çykyşlar 21-nji dekabrda Türkmenistanyň Döwlet medeniýet merkeziniň Mukamlar köşgünde geçiriler. Tomaşaçylar hytaý söweş sungatynyň döreýiş taryhy we onuň görnüşleri bilen tanşyp bilerler.