Şu ýylyň 16 – 18-nji noýabry günlerinde Türkmenistanyň Mary şäherinde Merkezi Aziýa ýurtlarynyň we Hytaýyň ýaşlarynyň forumy geçiriler. «Watan» habarlar gepleşiginde habar berlişi ýaly, şu gün sanly ulgam arkaly geçirilen Hökümet mejlisinde wise-premýer N.Amannepesow bu foruma taýýarlyk görlüşi barada döwlet Baştutanyna hasabat berdi.

Bellenilişi ýaly, bu forum Prezident Serdar Berdimuhamedowyň döwlet Baştutanlarynyň «Merkezi Aziýa – Hytaý» formatyndaky birinji sammitiniň barşynda öňe süren başlangyjyna laýyklykda guralar.

Wise-premýeriň hasabatynda häzirki wagtda Türkmenistanyň Daşary işler ministrligi, Magtymguly adyndaky Ýaşlar guramasy, degişli ministrlikler we pudaklaýyn dolandyryş edaralary tarapyndan bu forumyň ýokary guramaçylyk derejesini üpjün etmek üçin zerur çäreleriň görülýändigi barada aýdyldy.

Foruma Türkmenistanyň milli ykdysadyýetiniň dürli ulgamlarynda zähmet çekýän hünärmenleriň, talyp we meýletinçi ýaşlaryň, şeýle hem HHR-iň, Gazagystanyň, Gyrgyzystanyň, Täjigistanyň we Özbegistanyň ýaş wekilleriniň gatnaşmagyna garaşylýar.

Forumyň gün tertibine ýurtlaryň we halklaryň arasynda netijeli gatnaşyklary ösdürmäge gönükdirilen hyzmatdaşlygyň täze mazmunly formatyny ýola goýmak, howanyň üýtgemegi, daşky gurşawyň durnuklylygy, bilim, ylym, innowasiýalar, medeniýet we sungat ýaly ulgamlarda hyzmatdaşlygy pugtalandyrmak bilen baglanyşykly meseleler giriziler. Şunuň bilen birlikde, parahatçylygy we dostlugy pugtalandyrmakda Türkmenistanyň toplan baý tejribesi öwreniler, Beýik Ýüpek ýoluny dikeltmekde ýaşlaryň orny bilen bagly meseleler ara alnyp maslahatlaşylar.

Forumyň çäklerinde Merkezi Aziýa ýurtlarynyň we Hytaýyň medeniýet işgärleriniň we sungat ussatlarynyň festiwalyny guramak hem meýilleşdirilýär.

Prezident Serdar Berdimuhamedow hasabaty diňläp, Garaşsyz Türkmenistanda halkara ähmiýetli çäreleriň yzygiderli geçirilýändigini belledi hem-de Mary şäherinde Merkezi Aziýa ýurtlarynyň we Hytaýyň ýaşlarynyň gatnaşmagynda geçiriljek «Beýik Ýüpek ýolunyň täze eýýamy» atly forumyň hem ýokary derejede geçirilmegini üpjün etmegiň wajypdygyny nygtady.

Döwlet Baştutany bu forumyň ýaşlar syýasaty babatda halkara hyzmatdaşlygy ösdürmegiň anyk ýollaryny kesgitlemekde möhüm ähmiýetiniň boljakdygyna berk ynam bildirip, wise-premýer N.Amannepesowa degişli tabşyryklary berdi.