Türkmenistan we Türkiýe uniwersitetlerde bakalawr, magistr we doktorlyk maksatnamalaryna talyplary kabul etmäge mümkinçilik berýän bilelikdäki diplom maksatnamalaryny açar. Bu barada Türkiýe Ýokary bilim geňeşi habar berdi.

Bilelikdäki diplom maksatnamalary talyplaryň dürli ýurtlardaky uniwersitetlerde okap we iki ýurtda hem diplom alyp biljek bilim usulydyr.

Okuwyň bu görnüşi, Türkmenistanyň Bilim ministrligi bilen Türkiýe Respublikasynyň Ýokary bilim geňeşiniň arasynda ýokary bilim pudagyndaky hyzmatdaşlyk üçin özara düşünişmek hakyndaky Ähtnamanyň netijesinde mümkin boldy.

Bu resminama Türkmenistanyň Prezidenti Serdar Berdimuhamedowyň 25-26-njy oktýabr aralygynda Türkiýä edýän saparynyň çäginde gol çekildi.

Özara düşünişmek Ähtnamasy bilim hereketini we tejribe işini, şeýle hem iki ýurduň uniwersitetlerinde gysga möhletli ylmy meýilnamalara türkmen we türk talyplarynyň, mugallymlarydyr ylmy hünärmenleriň gatnaşmagyny üpjün edýär.

Mundan başga-da, okuw materiallaryny alyş-çalyş etmek, bilelikdäki ussatlyk sapaklary, konferensiýalary, seminarlary geçirmek, şeýle hem Türkmenistanyň we Türkiýäniň bilim edaralaryna baryp görmek meýilleşdirilýär.
Hyzmatdaşlygy utgaşdyrmak üçin ýokary bilim boýunça türkmen-türk bilelikdäki hemişelik komiteti dörediler.

Türkiýäniň Ýokary bilim geňeşiniň habaryna görä, respublikada okaýan türkmen talyplarynyň arasynda ilkinji kömek we gyssagly kömek, bank we ätiýaçlandyryş, buhgalteriýa we sergi fakultetlerine uly isleg bildirilýär.

Türkmenistandan bakalawr derejesini alan talyplar köplenç taryh we pedagogika fakultetlerine girýärler. Magistr maksatnamalarynda talyplar taryhy öwrenmegi, doktorlyk okuwlarynda, halkara gatnaşyklary we taryhy öwrenmegi makul bilýärler.