Lýuksemburgda geçirilen «Merkezi Aziýa — ÝB»-niň ministrler duşuşygynyň çäklerinde Türkmenistanyň DIM-niň ýolbaşçysy R.Meredow Ýewropa Bileleşiginiň Halkara hyzmatdaşlygy boýunça komissary Ýutta Urpilaýnen bilen ikitaraplaýyn gepleşik geçirdi.

23-nji oktýabrda bolan duşuşykda esasy üns «Ýewropa Topary» maksatnamasynyň sebitleýin başlangyçlaryna gönükdirildi diýlip, Türkmenistanyň DIM-niň resmi saýtynda habar berildi. Bu çekişmeler energetika we ulag pudagynda hyzmatdaşlygyň mümkinçiligi barada çuň gepleşikler üçin esas döretdiler. Şeýle hem Türkmenistanyň Bütindünýä Söwda Guramasyna (BSG) goşulmagyndaky öňegidişligi görkezildi. Türkmenistanyň daşary syýasy edarasynyň ýolbaşçysy türkmen tarapynyň ÝB-niň bu ugurdaky goldawyna ýokary baha berjekdigini aýtdy.

Habarda bellenilişi ýaly, Ýewropa komissary Urpilaýnen Türkmenistanyň BSG agzalygyna bolan islegini we bu ugurda alnyp barylýan özgertmeleri göz öňünde tutup, tehniki kömek bermäge taýýardygyny aýtdy.

Duşuşygyň barşynda esasy ara alnyp maslahatlaşylan meseleler energetika pudagyna, hususan-da wodorod energiýasyna, metanyň zyňyndylaryny azaltmaga we tebigy gazy gaýtadan dikeltmäge gönükdirildi. DIM-niň ýolbaşçysy wodorod we metan gözleginde Türkmenistan bilen «GIZ»-iň arasyndaky bilelikdäki taslamalary mysal getirdi.

Taraplar energetika taslamalaryna yzygiderli çemeleşmegiň zerurdygyny bellediler we bu ugurda hyzmatdaşlyk üçin hereket Meýilnamasyny bilelikde işläp düzmegiň möhümdigini aýtdylar.

Şeýle hem R.Meredow halkara hyzmatdaşlygy ösdürmäge we Türkmenistanyň Global Metan borçnamasyna goşulmak meselesini öwrenmäge gönükdirilen 2023-2024-nji ýyllar üçin Ýol kartasynyň işlenip düzülmegi barada Ýewropa Komissaryna habar berdi, diýlip habarda bellenilýär.

Ý.Urpilaýnen Ýewropa Bileleşiginiň bu ugurda başlangyçlary ösdürmäge gönükdirilen ýaşyl energetika pudagynda «GIZ» taslamasy bilen şertnama baglaşmak mümkinçiligine seredýändigini belledi.

«Ýewropa Topary» taslamasynyň işlerini we başlangyçlaryny utgaşdyrmak üçin ýöriteleşdirilen mehanizmi döretmek boýunça alnyp barylýan işleriň çäginde Ýewropa gurluşynyň başlygy Türkmenistany bu täze mehanizmiň çäginde ÝB bilen işjeň işleşmäge çagyrdy.

Soňky meseläniň sebit üçin ýerliklidigini göz öňünde tutup, sanly aragatnaşyk we suw serişdeleriniň dolandyrylyşy pudagynda hyzmatdaşlygyň mümkinçilikleri hem ara alnyp maslahatlaşyldy. ÝB-niň Komissary «Ýewropa Topary» maksatnamasynyň sanly integrasiýa ugrundaky täsirine ýokary baha berdi we bu ugurda Türkmenistan bilen hyzmatdaşlygy güýçlendirmäge taýýardygyny tassyklady.

Duşuşygyň barşynda Ý.Urpilaýnen 2024-nji ýylyň ýanwar aýynda Brusselde geçiriljek maýadarlar Forumyna türkmen wekiliýetine çakylyk iberdi.