10–11 dekabrda Türkmenistanyň Türkiýe Respublikasyndaky ilçihanasy Karabuk uniwersitetinde Türkmenistanyň Hemişelik Bitaraplyk derejesiniň 30 ýyllygy hem-de 2025-nji ýylyň “Halkara parahatçylyk we ynanyşmak ýyly” diýip yglan edilmegi mynasybetli çäreleriň toplumy" geçirdi.

Çäreleriň maksatnamasy türkmen halkynyň baý medeni mirasyny hem-de Türkmenistanyň häzirki zaman ösüşlerini şöhlelendirýän surat serginiň açylyşy bilen başlandy.

Soňra Karabuk uniwersitetiniň Kongres zalynda “Türkmenistanyň hemişelik Bitaraplygynyň 30 ýyllygy: parahatçylyk we ynanyşmak ugrunda hyzmatdaşlyk” atly halkara maslahat geçirildi. Maslahata Karabuk we Bolu uniwersitetleriniň ýolbaşçylary, ýerli häkimiýetleriň wekilleri, ylmy jemgyýetiň agzalary, talyplar we KHBS-niň wekilleri gatnaşdylar.

Maslahatyň dowamynda çykyş edenler Türkmenistanyň daşary syýasatynyň durnukly binýady bolup durýan Hemişelik Bitaraplyk hukuk derejesiniň möhüm ähmiýetini nygtadylar. Şeýle-de maslahatda Türkmenistanyň Prezidenti Serdar Berdimuhamedowyň hem-de türkmen halkynyň Milli Lideri Gurbanguly Berdimuhamedowyň tarapyndan halkara giňişliginde öňe sürlen başlangyçlaryň sebitleýin we ählumumy derejede ynanyşmagy, özara düşünişmegi we hyzmatdaşlygy pugtalandyrmaga gönükdirilendigi bellendi.

Maslahat tamamlanandan soňra işjeň gatnaşyjylara Türkmenistanyň ilçihanasynyň adyndan Minnetdarlyk hatlary we ýadygärlik sowgatlary gowşuryldy.

Çäreler toplumy Türkmenistanly talyplar tarapyndan taýýarlanan sungat çykyşlary bilen baýlaşdyrylan baýramçylyk konserti bilen dowam etdi. Konsert maksatnamasy dostlukly gurşawy döretmek bilen türkmen halkynyň milli medeniýetiniň we döredijiliginiň baýlygyny we köpdürlüligini görkezdi.

Türkmenistanyň Bitaraplygynyň 30 ýyllygyna bagyşlanan çäreler talyp ýaşlaryň arasynda futbol, woleýbol, stoluň üstünde oýnalýan tennis we küşt boýunça gurnalan sport bäsleşikleri bilen dowam etdi. Ýaryşyň ýeňijilerine Türkmenistanyň ilçihanasynyň adyndan Kuboklar we medallar gowşuryldy.

Çäreler türkmen milli tagamlary bilen ýörite taýýarlanan baýramçylyk saçagy bilen tamamlandy. Oňa gatnaşyjylar hoşamaý we erkin ýagdaýda özara pikir alyşmaga, türkmen halkynyň köpasyrlyk taryhy we häzirki döwürde gazanan ýokary üstünlikleri bilen has ýakyndan tanyşmaga mümkinçilik aldylar.