Türkmenistanyň Prezidenti Serdar Berdimuhamedowyň we türkmen halkynyň Milli Lideri Gurbanguly Berdimuhamedowyň sanlylaşdyrma ulgamynda durmuşa geçirýän oýlanyşykly syýasaty, tagallalary netijesinde soňky ýyllarda Türkmenistanyň ilatyna internet ulgamy arkaly howa we otly gatnawlary üçin petekleri onlaýn satyn almak, şeýle hem telefon we internet üçin uzak aralykdan töleg geçirmek ýaly hyzmatlar elýeterli boldy.

Şu hili hyzmatlardan peýdalanmagyň gurallarynyň biri-de «Saraý» mobil goşundysy bolup, ol ulanyjylaryna onlaýn töleg etmäge, petek satyn almak we harytlar barada maglumatlary gözlemek bilen baglanyşykly birnäçe meseläni birbada çözmäge mümkinçilik berýän köpugurly internet platformasydyr.

«Saraý» goşundysy 2019-njy ýylda işlenip düzüldi we ulanyşa girizildi. Programma, şol döwürde täjirçilik mahabatlaryny ýerleşdirmek we onlaýn tölegleri amala aşyrmak üçin platforma bolup hyzmat edipdi.

«Saraý» goşundysyndan peýdalanmak bilen, ulanyjylar dürli hili görnüşli harytlar — gozgalmaýan emläk, awtoulaglar, elektronika we hojalyk enjamlary, gurluşyk materiallary, egin-eşikler, mebeller barada maglumatlary aňsatlyk bilen tapyp bilerler. «Saraý» goşundysynda şeýle hem «Hyzmatlar», «Dükanlar», «Kafeler» ýaly bölümlerde bildirişler ýetirilýär. Bu programmany ulanyp, boş iş orunlaryny gözlemek, toýlary we beýleki dabaralary guramak üçin hyzmatlardan peýdalanyp, internetden dürli sarp ediş harytlaryny we beýleki zatlary onlaýn sargyt edip bilersiňiz.

Häzirki wagtda «Saraý» goşundysynyň iň islegli aýratynlyklarynyň biri petekleri onlaýn satyn almakdyr. Programmanyň we bank kartynyň kömegi bilen awiapetekleri (içerki uçuşlar üçin) we otly peteklerini satyn almak bolýar. Smartonyň belgisi arkaly tiz hasaba alynmak, anyk nawigasiýa we satyn alnan petekleri yzyna gaýtaryp bermek şertleri «Saraýy» Türkmenistanda iň meşhur programmalaryň hatarynda öňe çykarýar.

«Saraý» Türkmenistanyň şäherçeleriniň we hatda uzakda ýerleşýän ilatly zolaklarynyň ýaşaýjylaryna hem demir ýol menziline ýa-da «Türkmenhowaýollarynyň» petek kassalaryna gitmezden, onlaýn görnüşde otly ýa-da awiapetekleri tiz satyn almaga mümkinçilik berýär.

Mundan başga-da, «Saraýyň» kömegi bilen öý telefony, IP-TV we AŞTU interneti (Aşgabadyň ýaşaýjylary üçin elýeterli), «Türkmentelekom» kompaniýasynyň çäksiz interneti, «Belet Film» onlaýn kinoteatry, smartfonyň hasabyny doldurmak ýaly aragatnaşyk hyzmatlary, şeýle hem sürüjiler üçin PÝGG jerime töleglerini ýeňil görnüşde geçirmek mümkindir. Türkmenistanyň islendik bank kartyny enjama birikdirmek arkaly, bary-ýogy birnäçe sekundyň dowamynda tölegi oňaýly amala aşyryp bolýar.

Ulanyjylary onlaýn hyzmatlar bilen üpjün etmek maksady bilen, «Saraý» «Türkmendemirýollary» we «Türkmenhowaýollary» agentlikleri, şeýle hem Türkmenistan Ministrler Kabinetiniň ýanyndaky Ulag we kommunikasiýalar Agentligi bilen netijeli hyzmatdaşlygy alyp barýar.

«Saraý» mobil goşundysyny «Google Play» we «App Store» internet dükanlaryndan ýükläp alyp bilersiňiz. Şeýle hem, goşundynyň öz web görnüşi bolup, ýöne onda hyzmatlara töleg etmek we petek satyn almak mümkinçiligi ýokdur.