Girmek
Moskwanyň «Likomotiwiniň» we «Dinamosynyň», Tulanyň «Arsenalynyň», «Rostowyň», Samaranyň «Krylýa Sowetow» toparynyň ozalky baş tälimçisi, çernogoriýaly hünärmen Miodrag Božowiçe görä, türkmenistanly Gurban Berdiýewiň tälimçiligi ýokary derejede. Ol Russiýada işlän ýyllarynda Gurban Berdiýewi iň güýçli kärdeşleriniň biri hasaplaýar.
«Russiýada işleýärkäm, kärdeşlerimiň içinde Gurban Berdiýew iň gowusydy. Ol iki gezek Russiýanyň çempiony boldy. Ol döwürde häzirkiden güýçli bäsdeşlik bardy. Gurban Berdiýew bolsa özüni diňe bir Russiýada görkezmän, eýsem, «Barselona» ýaly dünýä ägirdini hem ýeňdi. «Rostow» bilen gazanan üstünlikleri hem ählimize aýan» diýip, ol «Sport.24» neşirine beren interwýusynda aýtdy.
Ol Mahaçkalanyň «Dinamosynyň» hem Gurban Berdiýewiň ýolbaşçylygynda Russiýanyň Premýer ligasyna dolanyp geljekdigine ynanýar.
14 utukly «Dinamonyň» Birinji ligada ikinji basgançakda barýandygyny ýatladýarys. Topar diňe «Alaniýadan» bir utuk yzda.