Girmek
Türkmenistanyň daşary işler ministri Raşid Meredow we Eýran Yslam Respublikasynyň ýol we şäher gurluşygy ministri Mehrdad Bazrpaş telefon arkaly söhbetdeş boldular. Bu barada Türkmenistanyň Daşary işler ministrliginiň metbugat gullugy habar berdi.
Bellenilişi ýaly, söhbetdeşligiň barşynda Ykdysady hyzmatdaşlyk boýunça Hökümetara türkmen-eýran toparynyň ýakyn wagtda geçiriljek nobatdaky mejlisi bilen baglanyşykly meseleler ara alnyp maslahatlaşyldy.
Söhbetdeşligiň barşynda taraplar 2022-nji ýylyň 14-15-nji iýunynda Türkmenistanyň Prezidenti Serdar Berdimuhamedowyň we şu ýylyň 30-31-nji maýynda türkmen halkynyň Milli Lideri, Halk Maslahatynyň Başlygy Gurbanguly Berdimuhamedowyň Eýrana amala aşyran saparlarynyň ähmiýetine ünsi çekdiler.
Raşid Meredow we Mehrdad Bazrpaş ýokardaky saparlarda gazanylan şertnamalaryň iş ýüzünde durmuşa geçirilmeginiň möhümdigini bellediler.