Girmek
Dubaýda ýerleşýän «Dragon Oil Holdings» kompaniýasy Yrakda we Türkmenistanda alyp barýan işleriniň gerimini has-da giňeltmek arkaly nebit önümçiligini günde 120 000 barrele çenli ýokarlandyrmagy meýilleşdirýär.
Bu barada kompaniýanyň Baş direktory Ali Al-Jarwanyň sözlerine salgylanyp, «Newscentralasia.net» internet neşiri habar berdi.
BAE-niň Milli nebit kompaniýasynyň (ENOC) doly eýeçiligindäki «Dragon Oil» häzirki wagtda daşary ýurtlarda her gije-gündizde 180 000 barrel nebit öndürýän bolsa, bu görkezjini 2026-njy ýyla çenli 300 000 barrele ýetirmek meýilleşdirilýär.
«Häzirki wagtda BAE-den daşarda hem ägirt uly meýilnamalarymyz bar. Soňky döwürlerde has-da ilerledilýän Yrakdaky we Türkmenistandaky önümçiliklerimizi giňeltmek isleýäris. Azerbaýjanda we beýleki ýurtlarda-da täze mümkinçilikleri gözleýäris» - diýip, Jarwan aýtdy.
«Dragon Oil» — Ýakyn Gündogarda, Demirgazyk Afrikada we Hazar sebitinde iş tejribesi bolan, esasan, uglewodorod serişdelerini gazyp almak bilen meşgullanýan halkara nebit kompaniýasydyr. 2000-nji ýyldan bäri «Dragon Oil» Türkmenistanda Hazaryň kenaryndaky Jeýtun we Jygalybeg ýataklaryny öz içine alýan Çeleken şertnamalaýyn çäginde işlerini üstünlikli alyp barýar.