Türkmenistanyň Garaşsyzlygynyň 32 ýyllygy mynasybetli, döwlet sylaglaryna mynasyp bolan medeniýet ulgamynyň işgärlerini hem-de Türkmenistanyň Prezidentiniň «Türkmeniň Altyn asyry» atly bäsleşiginiň ýeňijilerini sylaglamak dabarasy geçiriler. Bu barada anna güni sanly ulgam arkaly geçirilen giňişleýin Hökümet mejlisiniň barşynda Ministrler Kabinetiniň Başlygynyň orunbasary M.Mämmedowanyň ýurt Garaşsyzlygynyň 32 ýyllygy mynasybetli meýilleşdirilen çärelere taýýarlyk görlüşi baradaky hasabatynda aýdyldy.

Bellenilişi ýaly, baýramçylyk çäreleriniň maksatnamasyna laýyklykda, Garaşsyzlyk binasyna gül goýmak, ýurduň welaýatlarynyň Baş baýdak meýdançalarynda Döwlet baýdagyny galdyrmak dabaralary geçiriler, Aşgabatda Döwlet münberiniň öňündäki baýramçylyk meýdançasynda dabaraly ýöriş bolar, «Älem» medeni-dynç alyş merkeziniň öňündäki meýdançada baýramçylyk konserti we feýerwerki meýilleşdirilýär. Şular bilen bir hatarda, Halkara ahalteke atçylyk sport toplumynda baýramçylyk at çapyşyklary geçiriler, bagşy-sazandalaryň çykyşlary, amaly-haşam sungatynyň eserleriniň sergisi, sungat ussatlarynyň çykyşlary guralar.

Bulardan başga-da, ýurduň gazet-žurnallarynyň ählisinde Türkmenistanyň Garaşsyzlygyny, özygtyýarlylygyny we döwlet berkararlygyny wasp edýän eserler yzygiderli çap edilýär, ozal yglan edilen döredijilik bäsleşikleriniň jemleri jemlenilýär. Şeýle hem dokumental filmler, wideoşekiller, dürli mazmunly gepleşikler taýýarlanyp, ýaýlyma berilýär, olary daşary ýurt teleýaýlymlarynda görkezmek boýunça giň gerimli işler dowam etdirilýär.

Prezident Serdar Berdimuhamedow hasabaty diňläp, Garaşsyzlyk ýyllarynda örän uly işleriň amala aşyrylandygyny, ähli ulgamlarda uly ösüşleriň gazanylandygyny belledi.

Döwlet Garaşsyzlygy bize milli maddy-ruhy gymmatlyklarymyzy gaýtadan dikeltmäge, biziň gadymdan gelýän parahatçylyk, dostluk we ynsanperwerlik däplerimizi tutuş dünýäde ilerletmäge mümkinçilik berdi. Milli däpleri ösdürmekde, taryhy-medeni mirasy aýawly saklamakda we wagyz etmekde, eziz Watanymyzyň şan-şöhratyny artdyrmakda medeniýet işgärleriniň alyp barýan işlerine möhüm orun degişlidir - diýip, Türkmenistanyň Prezidenti nygtady.

Prezident Serdar Berdimuhamedow ýurduň mukaddes Garaşsyzlygynyň 32 ýyllygynyň mynasyp garşylanmagyny üpjün etmegiň wajypdygyna ünsi çekip, wise-premýere bu babatda birnäçe anyk tabşyryklary berdi.