Girmek
Liwiýanyň Türkmenistandaky Ykdysady hyzmatdaşlyk býurosy Liwiýadaky güýçli sil joşgunynda wepat bolanlary hatyralady. Bu çärä Türkmenistanyň daşary işler ministriniň orunbasary Wepa Hajiýew, ýurtda akkreditlenen diplomatik wekilhanalaryň ýolbaşçylary, jemgyýetçilik we halkara guramalaryň, şeýle hem habar beriş serişdeleriniň wekilleri gatnaşdylar.
Wepa Hajiýew weýrançylykly sil joşgunynda ejir çekenlere duýgudaşlyk kitabynda ýazgy galdyryp, pida bolanlaryň dogan-garyndaşlaryna we ýakynlaryna çyn ýürekden duýgudaşlyk we medet beriji sözlerini aýtdy, şeýle hem ejir çekenleriň tiz wagtda sagalmagyny arzuw etdi.
Mälim bolşy ýaly, 10-njy sentýabrda «Daniel» deňiz tupany sebäpli Liwiýanyň demirgazyk-gündogaryndaky Ortaýer deňziniň Derna şäheriniň golaýynda iki bent ýykyldy. Şäherleri we şäherçeleri suw basdy.
Gyzyl Haç guramasynyň soňky hasaplamalaryna görä, Liwiýada sil joşguny 11 müňden gowrak adamyň ölmegine we 20 müňden gowrak adamyň dereksiz ýitmegine sebäp boldy. BMG-niň işgärleriniň aýdyşy ýaly, bu ýurt «epiki ululykdaky betbagtçylygy» başdan geçirýär.