Girmek
Türkmenistanly ozalky futbolçylar Amandurdy Annadurdyýew we Ýazguly Hojageldiýew «Barselonanyň» rowaýaty oýunçylarynyň Merkezi Aziýanyň rowaýaty ýyldyzlaryna garşy oýnunda meýdança çykarlar. Duşuşyk 30-njy awgustda Gyrgyzystanyň Bişkek şäherinde geçiriler. Bu barada gyrgyz sport neşiri habar berdi.
Bu oýna «Barselonanyň» rowaýaty oýunçylaryndan Ronaldinýonyň, Riwaldonyň, Karles Puýolyň, Hawýer Sawýolanyň, Ronald De Buruň, Žuliano Belettiniň, Fançesko Kokunyň gatnaşmagyna garaşylýar.
Duşuşykda Merkezi Aziýanyň rowaýaty ýygyndysynyň düzüminde türkmenistanly eks-futbolçylar Amandurdy Annadurdyýew we Ýazguly Hojageldiýew, özbegistanly Mirjalol Kasymow, täjigistanly Muhsin Muhammadiýew, gazagystanly Samat Smakow, ýaponiýaly Hidetoşi Nakata we russiýaly Andreý Kançelskis dagy hereket eder.
Rowaýaty oýunçylaryň duşuşygy Gyrgyzystanyň Jalal-Abad şäherinde «Barselonanyň» futbol akademiýasynyň açylmagy mynasybetli guralar. Gyrgyz sport neşirlerini bu oýunda ýurduň Prezidenti Sadyr Japarowyň hem Merkezi Aziýanyň rowaýaty ýygyndysynyň düzüminde futbol oýnamagyna garaşylýandygyny ýazýarlar.