UNRCCA-nyň başlygynyň orunbasary Filipp Saprykin Türkmenistanyň, Täjigistanyň we Özbegistanyň Prezidentleriniň ilkinji sammitiniň çäginde üç ýurduň ýolbaşçylaryna Merkeziň sebitdäki işi barada habar berdi. Muny UNRCCA-nyň metbugat gullugyna salgylanyp, «CentralAsia.news» habar berdi.

Saprykin soňky 30 ýylda Merkezi Aziýa ýurtlarynyň döwletliligi berkitmekde we ykdysady ösüşi güýçlendirmekde möhüm öňegidişlik gazanandygyny aýtdy. Ol Merkezi Aziýanyň häzirki wagtda sebitleýin hyzmatdaşlygyň nusgasy bolup durýandygyny nygtady.

Merkez öz işinde BMG-niň Howpsuzlyk Geňeşiniň mandatyna daýanýar we Merkezi Aziýa döwletlerine sebit gün tertibiniň iň möhüm meselelerinde hyzmatdaşlygy güýçlendirmekde goldaw berýär. Merkeziň alyp barýan işlerinde serhetüsti suw serişdelerini dolandyrmak we klimatyň howpsuzlygy meselelerine aýratyn üns berilýär.

2022—2025-nji ýyllar üçin Merkezi Aziýa döwletleriniň suw-energetika, daşky gurşaw we howa babatda hyzmatdaşlygy goldamak strategiýasynyň çäklerinde UNRCCA birnäçe çäräni durmuşa geçirýär

Olaryň hatarynda şulary görkezmek bolar:

— Suw, energiýa we daşky gurşaw meseleleri boýunça özara bähbitli sebitleýin şertnamalaryň hukuk binýadyny güýçlendirmek;

— Merkezi Aziýada sebit aýratynlyklaryny şöhlelendirýän teklipleri we resminamalary ara alyp maslahatlaşmak boýunça çäreleri geçirmek;

— Hökümetara gepleşiklere goldaw, suw diplomatiýasy boýunça okuw we hyzmatdaş guramalar bilen iş gatnaşyklaryny ösdürmek;

— «2018—2028-nji ýyllarda durnukly ösüş üçin suw» halkara hereket onýyllygy boýunça ýokary derejeli halkara maslahatlaryň çäginde UNRCCA, ÝUNESKO we beýleki hyzmatdaşlar bilen bilelikde buzluklaryň eremegi temasynda çäreleri guraýar.

Merkez Merkezi Aziýanyň Suw hojalygyny utgaşdyrmak boýunça döwletara komissiýasynyň Ylmy-maglumat merkezi bilen bilelikde Amyderýa we Syrderýanyň suw serişdeleriniň ýagdaýy barada irki duýduryş barada özboluşly býulletenleri neşir edýär. Sebitde howanyň üýtgemegi barada aýdyň maglumat berýär.

BMG-niň Howpsuzlyk Geňeşi Merkezi Aziýada sebit hyzmatdaşlygyna uly ähmiýet berýär. Baş sekretaryň Merkezi Aziýa boýunça ýörite wekiliniň brifinginde Howpsuzlyk Geňeşiniň agzalary sebit ýurtlarynyň umumy gyzyklanma döredýän meseleleri çözmekdäki tagallalaryny yzygiderli goldaýandyklaryny merkeze mälim edýärler.

Ýakyn geljekde BMG-niň Baş sekretarynyň täze ýörite wekili Kaha Imnadze Merkezi Aziýa ýurtlarynyň ýolbaşçylary we resmi adamlary bilen duşuşar.

Filipp Saprykin çykyşynyň ahyrynda UNRCCA-nyň öňüni alyş sebit mandaty we Merkezi Aziýa döwletleriniň milli ileri tutulýan ugurlary esasynda sebitiň ösüşini doly goldamaga taýýardygyny belledi.