Girmek
Türkmenistanly hünärmen Dmitriý Homuha Russiýanyň «Şinnik» futbol toparynyň baş tälimçisi boldy. Bu barada Ýaroslaw şäheriniň futbol klubynyň metbugat gullugy habar berýär.
53 ýaşly hünärmen bilen iki ýyllyk şertnama baglaşyldy. Homuha ozalky baş tälimçi Dmitriý Woýeskogonyň ornuna getirildi.
«Dmitriý Homuha ýaroslawlylaryň futboly nä derejede söýýändigini bilýär. Ol 2001 ― 2003-nji ýyllar aralygynda biziň toparymyzyň köýnekçesini geýdi we 69 duşuşykda 16 gezek tapawutlandy. Biz bilen 2001-nji ýylda Russiýanyň Premýer ligasyna çykan Homuha ýurduň iň ýokary ligasynda ýedinji we bäşinji orunlary eýelemegimize goşant goşdy» diýlip, habarnamada aýdylýar.
Homuhanyň 2022 ― 2023-nji ýyllar aralygynda Ikinji ligada ýaryşýan «Kaluga» futbol toparyna tälim berendigini ýatladýarys. Ozal ol Russiýanyň 17 ýaşa çenli ýetginjekler ýygyndysy bilen Ýewropanyň çempiony, 19 ýaşa çenli ýaşlar bilen Ýewropa çempionatynyň kümüş medalynyň eýesi bolupdy.
Ýaroslaw şäherine wekilçilik edýän «Şinnik» Russiýanyň Birinji ligasynyň tamamlanan möwsüminde ýedinji orny eýeledi.
Pöwrizede doglan Dmitriý Homuha Türkmenistanda «Kolhozçy» futbol toparynyň köýnekçesini geýdi. Ol Türkmenistanyň milli ýygyndysynyň hatarynda 1998-nji ýylda Taýlandda geçirilen Aziýa oýunlaryna hem gatnaşdy.