Türkmenistanyň daşary işler ministriniň orunbasary Wepa Hajyýew 2023-nji ýylyň 19-20-nji iýun günlerinde terrorçylyga garşy göreşmek boýunça geçiriljek çärelere gatnaşmak üçin, BMG-niň ştab-kwartirasynyň ýerleşýän ýeri bolan ABŞ-nyň Nýu-Ýork şäherine sapar bilen barar. Bu barada Türkmenistanyň BMG-niň ýanyndaky Hemişelik wekilhanasy habar berýär.

19-20-nji iýunda geçiriljek BMG-ä agza ýurtlaryň Terrorçylyga garşy göreşmek agentlikleriniň ýolbaşçylarynyň üçünji maslahaty «Köptaraplaýyn we institusional hyzmatdaşlygyň üsti bilen terrorçylyga garşy göreşi işjeňleşdirmek» atly tema bagyşlanylar.

Maslahatda oňa gatnaşyjylar maglumat we tejribe alyşarlar hem-de terrorçylyga garşy göreşmekde ileri tutulýan ugurlar boýunça hyzmatdaşlygy giňeltmegiň mümkinçiliklerini ara alyp maslahatlaşarlar.

Maslahat BMG-niň umumy gün tertibi barada guramanyň Baş sekretary tarapyndan teklip edilen Parahatçylyk üçin täze gün tertibini taýýarlamak babatda möhüm tapgyr bolar.

Türkmenistanyň daşary işler ministriniň orunbasary W.Hajyýewiň bu ýokary derejeli çärelere gatnaşmagy Türkmenistanyň terrorçylyga garşy göreşmekde hem-de sebit we ählumumy howpsuzlygy üpjün etmekde oňyn hyzmatdaşlyga berk ygrarlydygyny görkezýär.

Saparyň dowamynda W.Hajyýew konferensiýanyň umumy mejlisine gatnaşyp, Türkmenistanyň terrorçylyga garşy göreşmekde toplan milli tejribesini paýlaşar. Şeýle-de beýleki milli wekiliýetleriň birnäçesiniň ýolbaşçylary, BMG-niň wekilleri hem-de halkara hyzmatdaşlar bilen ikitaraplaýyn duşuşyklary geçirer.