7-nji iýunda türkmen wekiliýeti TOPH gaz geçiriji taslamasynyň we TOP elektrik geçiriji liniýasynyň taslamasynyň durmuşa geçirilişini ara alyp maslahatlaşmak üçin iki günlük sapar bilen Yslamabada geldi.

Şol gün Pakistanyň Energetika ministrliginde ikitaraplaýyn duşuşyk geçirildi. Duşuşykda türkmen wekiliýetine Türkmenistanyň döwlet ministri — «Türkmengaz» döwlet konserniniň başlygy Maksat Babaýew, Pakistanyň wekiliýetine bolsa Federal Energetika ministri Hurram Dastgir Han ýolbaşçylyk etdi. Şeýle hem duşuşyga Türkmenistanyň Energetika ministriniň orunbasary Annageldi Saparow hem-de Pakistanyň nebit ministri Musadyk Masud Malik gatnaşdy.

Duşuşygyň dowamynda taraplar energetika pudagynda ikitaraplaýyn hyzmatdaşlygyň köp meselelerini, hususan-da, Türkmenistan — Owganystan — Pakistan — Hindistan (TOPH) transmilli gaz geçirijisini we Türkmenistan — Owganystan — Pakistan (TOP) elektrik liniýasy we optiki süýümli aragatnaşyk liniýasy taslamalaryny ara alyp maslahatlaşdylar.

Taraplar TOPH taslamasynyň iş ýüzünde durmuşa geçirilmeginde möhüm öňegidişlikleriň gazanylandygy barada ylalaşdylar. «Galkynyş» gaz käninden türkmen-owgan serhedine çenli uzynlygy 214 kilometr bolan TOPH gaz geçirijisiniň Türkmen bölüminiň gurluşygy tamamlandy.

Bellenilişi ýaly, TOPH gaz geçirijisi, diňe bir gaz geçirijisini we desgalaryny elektrik energiýasy bilen üpjün etmän, ýaşaýyş we senagat islegini kanagatlandyrmakda, şeýle hem Pakistanda elektrik energiýasynyň çykdajylaryny azaltmakda möhüm rol oýnap, TOP geçiriji liniýasyna parallel hereket eder.

Pakistan tarapy, ýurduň hökümetiniň TOPH we TOP taslamalaryny doly goldaýandygyny, sebäbi olaryň sebitiň durmuş-ykdysady taýdan gülläp ösmeginde we Pakistanda energiýa howpsuzlygyny üpjün etmekde möhüm faktor bolup durýandygyny aýtdy.

Taraplar bilelikdäki energiýa taslamalaryny durmuşa geçirmek boýunça Türkmenistan bilen Pakistanyň tehniki iş toparlarynyň arasynda yzygiderli aragatnaşyk saklamak barada ylalaşdylar.