Girmek
Prezident Serdar Berdimuhamedow Merkezi Aziýa ýurtlarynyň we Hytaýyň ýaşlarynyň forumyny Mary şäherinde geçirmegi teklip etdi. Bu barada Türkmenistanyň döwlet Baştutany Hytaýyň Sian şäherinde geçirilýän «Merkezi Aziýa – Hytaý» birinji sammitindäki çykyşynda aýtdy.
Türkmenistanyň Döwlet habarlar agentliginiň habar bermegine görä, Prezident Serdar Berdimuhamedow çykyşynyň barşynda:
— Biz ynsanperwer ulgamda hyzmatdaşlygy berkitmegiň wajypdygyndan ugur alyp, ýurtlarymyzyň arasynda ylym-bilim gatnaşyklaryny ösdürmek ugrunda çykyş edýäris — diýip belledi.
Şeýle-de Prezident Serdar Berdimuhamedow:
— Merkezi Aziýanyň we Hytaýyň halklarynyň dünýä ajaýyp alymlary, oýlap tapyjylary we akyldarlary berendigi mälimdir. Biz bolsa şol örän baý medeni we ylmy däpleriň mirasdüşerleri hem-de saklaýjylary bolup durýarys. Ine, şoňa görä-de biz bu gyzyklanmalary höweslendirmelidiris hem-de yzygiderli esasda, giňden medeni we ylmy alyşmalara işjeň ýardam bermelidiris — diýip nygtady.
— Merkezi Aziýa ýurtlarynyň we Hytaýyň halklarynyň arasynda yzygiderli gatnaşyklary ýola goýmagyň hem-de giňeltmegiň möhümdigi baradaky pikiri ösdürmek bilen, Merkezi Aziýa ýurtlarynyň we Hytaýyň ýaşlarynyň forumyny guramagy we şu ýylyň noýabrynda Mary şäherinde geçirmegi teklip edýärin — diýip, Türkmenistanyň döwlet Baştutany aýtdy.