Şu gün Prezident Serdar Berdimuhamedow, HHR-iň Başlygy Si Szinpiniň çakylygy boýunça, Sian şäherinde geçiriljek «Merkezi Aziýa — Hytaý» sammitine gatnaşmak üçin iş sapary bilen Hytaý Halk Respublikasyna ugrady. Aşgabadyň Halkara howa menzilinde döwlet Baştutanyny ýurduň resmi adamlary ugratdylar.

Howa menzilinde Prezident Serdar Berdimuhamedow HHR-iň Türkmenistandaky ilçihanasynyň wekili bilen gürrüňdeş boldy. Söhbetdeşligiň barşynda ugurlaryň giň gerimini, şol sanda söwda-ykdysady, nebitgaz, medeni-ynsanperwer ulgamlary öz içine alýan döwletara hyzmatdaşlygyň strategik häsiýete eýedigi nygtaldy. Şeýle-de Türkmenistanda şu gezekki sapara türkmen-hytaý hyzmatdaşlygyny, şol sanda «Merkezi Aziýa — Hytaý» görnüşindäki hyzmatdaşlygy işjeňleşdirmegiň ýolundaky möhüm ädim hökmünde garalýandygy bellenildi.

«Watan» habarlar gepleşiginde habar berlişi ýaly, Türkmenistanyň Prezidentiniň Hytaý Halk Respublikasyna bu saparynyň dowamynda resminamalaryň uly toplumyna gol çekmek meýilleşdirilýär. Iş saparynyň çäklerinde Prezident Serdar Berdimuhamedowyň HHR-iň Başlygy Si Szinpin bilen duşuşygy meýilleşdirildi. Nobatdaky ýokary derejede geçiriljek gepleşikleriň jemleri boýunça resminamalaryň birnäçesine gol çekmek göz öňünde tutulýar. Olar ikitaraplaýyn hyzmatdaşlygyň şertnama-hukuk binýadynyň üstüni ýetirer.

Belläp geçsek, bu sapar Prezident Serdar Berdimuhamedowyň HHR-e şu ýylyň dowamynda amala aşyrýan ikinji saparydyr. Şu ýylyň ýanwarynda Prezident Serdar Berdimuhamedowyň HHR-e amala aşyran döwlet sapary strategik gatnaşyklary ösdürmegiň ýolunda nobatdaky ädime öwrüldi. Ynanyşmak we işjeňlik ýagdaýynda ýokary derejede geçirilen gepleşikleriň jemleri boýunça möhüm ylalaşyklar gazanyldy hem-de uly kuwwata eýe bolan hyzmatdaşlygy hil taýdan täze derejä çykarmaga gönükdirilen resminamalaryň toplumyna gol çekildi.